Сурхондарёда футбол ўйини вақтида юзага келган тортишув оқибатида 16 ёшли йигит вафот этди. Бу ҳақда Тергов департаменти хабар берди.
Маълумотларга кўра, 23 август куни соат 20:45 да 16 ёшли А.А. Сурхондарё вилояти Қизириқ тумани «Истиқлол» маҳалласида жойлашган кичик футбол ўйингоҳида футбол ўйнаётган вақти рақиб жамоадаги тенгдоши И.Х. билан ўзаро тортишиб қолган.
Улар яккама-якка уришиш мақсадида стадиондан ташқарига чиқиб, жанжални давом эттирган вақтида А.А. чап оёғи тиззаси билан И.Х.нинг олд кўкрак ўрта соҳасига бир марта зарб билан тепиб тан жароҳати етказган.
Оқибатда вояга етмаган И.Х. олган тан жароҳати сабаб соғлиғи ёмонлашиб, ҳодиса жойида вафот этган.
Мазкур ҳолат юзасидан Қизириқ туман ИИБ ҳузуридаги тергов гуруҳи томонидан А.А.га нисбатан Жиноят кодексининг 104-моддаси 3-қисми «д» банди (жабрланувчининг ўлимига олиб келган қасддан баданга оғир шикаст етказиш) билан жиноят иши қўзғатилиб, А.А. гумон қилинувчи тариқасида жалб қилинган ва процессуал тартибда ушланган.
Ҳозирда тергов ҳаракатлари давом эттирилмоқда.
Изоҳ (0)