Тошкент—Ўш автомобиль йўлида Isuzu юк машинаси иштирокида содир бўлган йўл-транспорт ҳодисаси оқибатида икки киши ҳалок бўлди, деб хабар беради ФВВ матбуот хизмати.
Маълумотларга кўра, 25 август куни соат 16:24 ларда А-373 Тошкент—Ўш автомобиль йўлининг 222,3-километрида йўл-транспорт ҳодисаси содир бўлган. Таъкидланишича, Isuzu русумли юк автомашина ҳайдовчиси бошқарувни йўқотиб, йўл ўртасидаги темир тўсиққа бориб урилган. Оқибатда ёнғин келиб чиқиб, автомашина ичидаги ҳайдовчи ва бир нафар йўловчи воқеа жойида вафот этган.
Юк машинаси 8 тонна қурилиш хом ашёси, яъни бетонга қўшиладиган кимёвий эритма олиб кетаётган бўлган.
«Юзага келган вазият юзасидан Қамчиқ махсус-қидирув, ёнғин-қутқарув бошқармаси бошлиғи полковник Х.Бобонов бошчилигидаги шахсий таркиб ҳамда махсус техникалар зудлик билан воқеа жойига етиб борган. Ёнғин-қутқарувчиларининг олиб борган тезкор саъй-ҳаракатлари натижасида ёнғин қисқа вақт ичида бартараф этилди», — дейилади хабарда.
Аввалроқ Тошкент—Ўш йўлида юк машинаси поезд билан тўқнашиб кетгани тўғрисида хабар берилганди.
Изоҳ (0)