«Темир дафтар»га киритилган оилаларда яшовчи талабалар 4 миллион сўмгача белгиланган чегирмани олиш учун «темир дафтар» рўйхатига киритилган оила аъзоси эканлигини тасдиқловчи маълумотни ўзи таҳсил оладиган ОТМ раҳбариятига тақдим этиши зарур. Бу ҳақда АОКА залида ташкил этилган брифингда Олий ва ўрта махсус таълим вазирлиги матбуот котиби Фарҳод Бабашев маълум қилган.
«Темир дафтар» рўйхатида эканлигини тасдиқловчи маълумотни олиш учун Маҳалла ва оилани қўллаб-қувватлаш вазирлигининг ҳудудий бўлинмалари (яъни ўзи яшаб турган ҳудудий бўлинмаси)га мурожаат қилишлари мақсадга мувофиқлиги таъкидланган.
Мавзуга доир: Ўзбекистонда 2020/2021-ўқув йилида кундузги шаклда ўқийдиган барча талабаларнинг контракт пули 10 фоизга камайтирилади
«ОТМларда сиртқи ва кечки таълим шаклида таҳсил олувчи талабалар асосий иш ўрни ва ўзларини моддий таъминлаш имкониятига эга бўлганлиги сабабли ушбу чегирмадан фойдалана олмайди», — дейди матбуот котиби.
Эслатиб ўтамиз, аввалроқ 10 фоизлик чегирма стипендиясиз шаклдаги тўлов-контракт миқдорига нисбатан ҳисобланиши ҳақида маълум қилинган. Олий Мажлис Сенати Фан, таълим ва соғлиқни сақлаш масалалари қўмитаси раиси Одилжон Иминов эса белгиланган контракт миқдори ўқитишнинг минимал харажатларини ҳам қоплай олмаётганига қарамасдан (ўртача 68 фоизи қопланмоқда) амалдаги контракт миқдори бўйича барча талабаларга 10 фоиз чегирма берилишини ижобий баҳолаш лозимлигини айтган. Олий ва ўрта махсус таълим вазири Иномжон Мажидов Олий таълим муассасаларида 2020/2021-ўқув йилига тайёргарлик масалалари бўйича АОКАда ташкил этилган матбуот анжуманида ОТМларда 2020 йилда контракт миқдори ўзгартирилмаслигини, бироқ камайиши мумкинлигини билдирган.
Изоҳ (0)