Бухорода карантин қоидаларини бузиб, 150 кишилик тўй қилган фуқарога қарийб 4,5 млн сўм жарима белгиланди

Бухоро вилоятининг Олот туманида қиз узатиш маросими карантин қоидаларига зид равишда ўтказилганлиги аниқланди. Бу ҳақда «Ўзбекистон24» телеканалида хабар қилинди.

Аҳоли эҳтиёжларини инобатга олган ҳолда Республика махсус комиссиясининг қарорига кўра карантин қоидаларини юмшатилиши билан тўй ва маросимларга рухсат этилган эди. Бунда меҳмонлар сони 30 нафардан ошмаслиги ва маросимлар хонадонларда ўтказилиши қатъий белгилаб қўйилган.

Маълум бўлишича, Бухоро вилояти Олот тумани ИИБ ҳуқуқбузарликлар профилактикаси инспекторлари томонидан ўрганишлар жараёнида тумандаги хонадонларнинг бирида қиз узатиш маросимида 150 киши иштирок этгани аниқланган.

Олот тумани ИИБ профилактика инспектори Қандиёр Рўзиевнинг айтишича, бу билан фуқаро амалдаги карантин талабларини бузиб, касалликнинг аҳоли орасида тарқалишига шароит яратиб берган.

«Эрталаб оила бошлиқларидан тўйни карантин нормаларига монанд ўтказиш бўйича тилхат олинган. Кечки пайт бориб текширганимизда тўйхонада 150 нафардан ортиқ фуқаро бўлганлиги сабабли маъмурий баённома тузилди», – деди инспектор.

Ҳуқуқбузар фуқарога нисбатан «Аҳолининг санитария-эпидемиологик осойишталиги тўғрисида»ги қонунинг аҳолининг санитария-эпидемиологик осойишталиги тўғрисидаги қонун 39-моддаси – ҳужжатларини бузганлик учун жавобгарлик ва Маъмурий жавобгарлик тўғрисидаги кодекснинг 54-моддаси – эпидемияларга қарши кураш қоидаларини бузишнинг иккинчи қисмига асосан баённома расмийлаштирилиб, унга шу модда билан базавий ҳисоблаш миқдорининг 20 баравари, яъни 4 миллион 460 минг сўм жарима жазоси тайинланган.

Тўй эгаси карантин қоидаларини бошқа бузмасликка сўз берган.

Аввалроқ «Менинг фикрим» жамоавий мурожаатлар порталида Ўзбекистонда тўй маросимларини 30 кишилик тартибда ўтказилишини доимий сақлаб қолиш ҳақида петиция жойлаштирилди.

Петицияда Олий Мажлис Қонунчилик палатаси Кенгаши ва Сенати Кенгашининг «Тўйлар, оилавий тантаналар, маърака ва маросимлар, марҳумнинг хотирасига бағишланган тадбирлар ўтказилишини тартибга солиш тизимини яна-да такомиллаштириш тўғрисида»ги қўшма қарорида белгиланган тўйларга 200 кишидан ортиқ меҳмон чақирмаслик ҳақидаги қоидани «30 кишилик» деб ўзгартириш таклиф қилинган.