Тошкент метрополитени раҳбарияти ижтимоий тармоқларда тарқалган баъзи бекатлардаги суянчиқсиз ўриндиқлар хиёбонлардаги суянчиқли ўриндиқлар билан алмаштирилгани ҳақидаги хабарларга изоҳ берди. Ижтимоий тармоқ фойдаланувчиларининг таъкидлашича, янги ўриндиқларнинг катталиги платформанинг кўринишини чеклаб қўймоқда.
Маълум қилинишича, ҳозирда метрополитен бекатларидаги ўриндиқларни режали таъмирлаш ишлари олиб борилмоқда. Таъмирлаш ишлари белгиланган жадвал асосида карантиндан олдинги даврда, йўловчилар учун хизмат кўрсатилмаган пайтда бошланган.
Қайта тиклаш жараёни махсус устахоналарда олиб борилишини ҳисобга олиб, хиёбонларга ўрнатилган ўриндиқлар билан вақтинча алмаштириш тўғрисида ички қарор қабул қилинган. Мазкур ўриндиқларни «Пахтакор» ва «Халқлар дўстлиги» бекатларида кўриш мумкин. Қайта таъмирлаш ишлари тугагандан сўнг ўриндиқлар ўз жойларига қайта ўрнатилади.
Шунингдек, Тошкент метрополитени маъмурияти аввалги ўриндиқлар гранит тошли бўлгани ҳақидаги маълумотларни рад этган.
«Шу кунларда ижтимоий тармоқларда метро станциялардаги ‘янгиланган’ ўриндиқлар тўғрисида нотўғри маълумот тарқатилиб, халқнинг салбий муҳокамасига сабаб бўлмоқда. Ушбу ҳолат қайд этилган ва расмда кўрсатилган станциялардаги гранит тошли ўриндиқлар ҳозир ҳам, бундан олдин ҳам бўлмаган. Аксинча, йўловчиларга қулай бўлиши учун ишга туширилган пайтдан бошлаб кенг ёғоч қопламали ўриндиқлар ўрнатилган», — дейилади хабарда.
Таъкидланишича, карантин даврида Тошкент метрополитенида таъмирлаш, қайта тиклаш ва бошқа қатор бунёдкорлик тадбирлари бўйича кенг қамровли ишлар амалга оширилган.
Эслатиб ўтамиз, Республика махсус комиссиясининг 12 августдаги қарори билан Тошкент метрополитени 15 августдан ўз ишини бошлади.
Изоҳ (0)