Андижон вилоятида шаърий никоҳдаги турмуш ўртоғини синтетик ип ёрдамида бўғиб ўлдирган ва мурдасини уйининг ҳожатхонаси чуқурига ташлаб юборган 25 ёшли аёлга суд ҳукми ўқилди. Бу ҳақда «Дарё»га Жиноят ишлари бўйича Андижон вилоят суди судья катта ёрдамчиси Комроншоҳ Расулов маълум қилди.
Жиноят ишлари бўйича вилоят суди судьяси Носиржон Расуловнинг маълум қилишича, судланувчи Х.Х. 2019 йилнинг февраль ойида фуқаро М.Қ. билан танишиб, у билан шаръий никоҳдан ўтган ҳолда яшаб келган.
2019 йилнинг 3 май куни чамаси соат 21:00 да эр-хотин жинсий алоқада бўлиш давомида М.Қ. турмуш ўртоғи Х.Х.дан ғайритабиий усулда унинг хоҳишига зид равишда жинсий алоқада бўлишини талаб қилган. Агарда таклифига рози бўлмаса уни уйидан ҳайдаб юборишини айтган. Бундай муносабатдан нафратланган Х.Х. эридан қутулиш мақсадида, уни қасддан ўлдирмоқчи бўлган. Эри ташқарига ювиниш учун чиққанидан фойдаланган Х.Х. икки дона оқ рангли бўз матодан тайёрланган этак ва синтетик ипни хонага олиб кирган.
М.Қ. хонага қайтиб кирганида Х.Х. уни ўлдиришни осонлаштириш мақсадида унинг таклифига рози эканлигини, фақатгина бошқача усулда алоқада бўлишни таклиф қилган. Шундан сўнг Х.Х. эрининг хоҳиши билан дастлаб унинг қўл ва оёқларини оқ рангли бўз матосидан ишланган этак ва синтетик ип билан боғлаган. Оғзини эса рўмол билан боғлаб, унинг устига ўтириб, олдиндан тайёрлаб қўйилган этак матоси билан бўйин соҳасини боғлаб, марҳум қимирлаб қаршилик кўрсатишига қарамай жони узилгунча бўғган ва ўлдирган.
Эртаси куни жасаднинг ҳиди кела бошлагач, аёл қўшнисидан арра олиб келиб, жасадни арралаб бўлган ва ҳожатхонага ташлаб юборган.
Мазкур ишни кўриб чиққан суд аёлни Жиноят кодексининг 97-моддаси 1-қисми (Қасддан одам ўлдириш) билан айбли деб топиб, унга 10 йил озодликдан маҳрум қилиш жазосини тайинлаган. Шунингдек, Х.Х.дан жабрланувчининг вакили Х.Қ. фойдасига 7 миллион сўм маънавий зарар ундирилиши лозимлигини белгилаган.
Изоҳ (0)