Сурхондарё вилояти Термиз шаҳрида фермерларнинг хабардорлигисиз уларнинг банк ҳисоб рақамида ноқонуний тарзда маблағ айланмасини амалга оширган собиқ банк ходими ушланди, дея хабар бермоқда Бош прокуратура «Дарё»га.
Қайд этилишича, Бош прокуратура ҳузуридаги департаментнинг Термиз шаҳар бўлими томонидан тадбиркорлик субъектларининг қонуний ҳуқуқ ва манфаатларини ҳимоя қилиш борасида терговга қадар текширув ўтказилган. Натижада «Ипотека банк» АТИБ Сурхондарё вилоят филиалининг собиқ бўлим бошлиғи К.И. 2 та фермер хўжалиги ва фуқаро С.га ажратилган жами 44,5 миллион сўм кредит маблағларини «Ф-К» фермер хўжалиги ҳисоб рақамига уларнинг хабардорлигисиз ўтказиш орқали талон-торож қилган.
Шунингдек, мазкур фермер хўжалигининг ҳисоб-рақамига бошқа фермер хўжаликларидан ўтказилган 150 миллион сўм маблағларини ноқонуний айланмасини амалга ошириб, хўжалик юритувчи субъектлар манфаатларига зарар етказганлиги аниқланган.
Мазкур ҳолат юзасидан К.И.га нисбатан Жиноят кодексининг 167-моддаси 3-қисми «г» банди (жуда кўп миқдорда ўзлаштириш ёки растрата йўли билан талон-торож қилиш) ва 209-моддаси 1-қисми (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
Мавзуга доир:
Изоҳ (0)