Коронавирус пандемияси шароитида Ўзбекистон мактабларида дарслар давомийлигини 30 дақиқа этиб белгилаш таклиф қилинмоқда. Бу ҳақда Санитария-эпидемиологик осойишталик агентлиги директори ўринбосари Баҳодир Алматов 25 август, сешанба куни бўлиб ўтган брифингда маълум қилди.
«Коронавирус болаларда анча енгил ўтади. Аксарият ҳолатларда белгисиз бўлиши ҳам мумкин. Лекин мактабларда болалар касаллик тарқатувчи бўлиб қолиши эҳтимоли бор. Бунинг олдини олиш учун ўқув йилини бошлаш бўйича меъёрий ҳужжат ишлаб чиқилди. Унга кўра, ўқув йилини бошлашдан олдин мактабларнинг тайёргарлик жараёни ўрганилади. Ҳар бир синфхонани шамоллатиш имконияти яратилади. Бино олди ва синфхоналарда антисептик дезинфекция воситалари ўрнатилади. Ўқитувчилар, мактаб ходимлари махсус тайёргарликдан ўтказилади. Ўқувчилар мактабда тиббий ниқобда бўлиши шарт«, — деди Баҳодир Алматов.
Унинг сўзларига кўра, дарслар давомийлигини 30 дақиқага ўтказиш тавсия қилинмоқда. Қайд этилишича, мактабларда дарс вақти соат 08:00 дан соат 15:00 гача давом этиши, бир синф ўқувчилари бошқаси билан мулоқот қилмаслиги, аралашиб кетмаслигига эътибор қаратиш керак бўлади.
Шунингдек, мактабларда оммавий тадбирлар ўтказиш мумкин эмас. Ошхоналар ишлашига йўл қўйилмайди. Бино ҳудудига бегоналар кириши тақиқланади.
Аввалроқ Ўзбекистон мактабларида янги ўқув йилини 14 сентябрдан бошлаш таклифи этилгани ҳақида хабар берилганди.
Изоҳ (0)