Самарқанд вилоятининг Нуробод туманида темир сандиқдан 8 минг 200 доллар ва 20 миллион сўмни ўғирлаганлар қўлга олинди. Бу ҳақда «Дарё»га хабар берган вилоят ИИБ ахборот хизматининг ёзишича, ўғрилик 2020 йилнинг 14 август куни содир бўлган.
Нуробод туманининг «Сазаған» маҳалласида яшовчи Ж. исмли фуқаро 2020 йил 21 август куни Нуробод туман ИИБга ариза билан мурожаат қилиб, уйига номаълум шахслар кирганини, темир сандиқ ичидан 8 минг 200 доллари ва 20 миллион сўм пулини ўғирлаганини маълум қилган.
Туман ИИБ ходимлари томонидан олиб борилган тезкор-қидирув ҳаракатлари давомида мазкур ўғриликни «Сазаған» маҳалласида яшовчи 22 ёшли Л. ва 24 ёшли Қ. содир этгани аниқланган ва улардаги ашёвий далиллар ҳужжатлаштирилиб олинган.
Мазкур ҳолат юзасидан Нуробод туман ИИБ ҳузуридаги Тергов бўлими томонидан Жиноят кодексининг 169-моддаси 3-қисми «в» (кўп миқдорда ўғрилик) банди билан жиноят иши қўзғатилиб, тергов ҳаракатлари олиб борилмоқда.
Мавзуга доир:
Изоҳ (0)