Андижон давлат тиббиёт институтида коронавирус инфекцияси профилактикаси, ташхис қўйиш ва даволаш бўйича ташкил этилган қисқа муддатли курслар орқали жами 9651 нафар водийлик шифокор коронавирусга чалинган беморларни даволаш учун ўқитилди. Бу ҳақда «Дарё»га институт матбуот хизмати ходими Одил Каримов хабар берди.
Маълум қилинишича, Президентнинг 2020 йил 29 январдаги «Ўзбекистон Республикасига коронавируснинг янги тури кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича республика махсус комиссиясини ташкил этиш тўғрисида»ги фармойиши ҳамда Соғлиқни сақлаш вазирининг 22 мартдаги «Коронавирус инфекциясини ташхислаш, даволаш ва олдини олиш бўйича захира мутахассисларни тайёрлаш тўғрисида»ги буйруғига асосан Андижон давлат тиббиёт институтида малака ошириш ва қайта тайёрлаш курслари ташкил этилган.
Институт ректори Мадамин Мадазимовнинг айтишича, ушбу махсус курсларга Андижон, Наманган ва Фарғона вилоятларида фаолият олиб бораётган 9651 нафар тиббиёт ходими ҳамда талабалар жалб қилинган. Уларнинг 3627 нафари олий тоифадаги шифокор, 3799 нафари ўрта ва 1426 нафари эса кичик тиббиёт ходими, 269 нафари клиник ординаторни ташкил этади. Шунингдек, 95 нафар магистратура ҳамда 435 нафари бакалавриат йўналишида таҳсил олувчи битирувчилар ҳам ушбу курсларга жалб қилинган.
«Бугунги вазият ҳамда ҳукумат комиссияси томонидан берилган топшириқлардан келиб чиқиб, июль ойида 69 нафар институт профессор-ўқитувчиси ҳамда 129 нафар тиббиёт ҳамда жамоат саломатлиги техникумлари ўқитувчиси тиббиёт ходимларини пулмонология мутахассислиги бўйича ўқитиш мақсадида қисқа муддатли курсларда малака оширди. Улар томонидан эса шу кунга қадар Андижон ҳамда Наманган вилоятларидаги даволаш-профилактика муассасаларида меҳнат қилаётган 274 нафар шифокор онлайн тартибда пулмонология мутахассислиги бўйича қайта ўқитилди. Шунингдек, ҳозирда 200 нафар шифокор инфекционист мутахассислиги бўйича ҳам ўқитилмоқда», — дейди Мадамин Мадазимов.
Изоҳ (0)