Ижтимоий тармоқларда Бухоро вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Мирали Ҳамроевнинг Бухоро вилояти ҳокими вазифасини бажарувчи этиб тайинланганлиги ҳақидаги хабарлар тарқалди. Орадан бироз фурсат ўтиб эса хабарлар ўчирилди. Мазкур ҳолат юзасидан Бухоро вилояти ҳокимлиги ахборот хизмати расмий баёнот берди.
«Вилоят ҳаёти билан боғлиқ бу каби маълумотлар ҳеч қандай асосга эга эмас. Бундай асоссиз хабарлар жамоатчиликни чалғитмоқда холос.
Вилоят ҳокимлиги матбуот хизмати юртдошларимизни норасмий ахборот саҳифаларида эълон қилинаётган маълумотлардан огоҳ бўлишга, ижтимоий тармоқлар фойдаланувчилари ва блогерларни эса ёлғон ахборот тарқатмасликка чақиради», — дейилади ахборотда.
Эслатиб ўтамиз, Бухоро вилояти ҳокими вазифасини бажарувчи, давлат ва жамоат арбоби Карим Камолов 22 август куни 65 ёшида вафот этган эди. Унда аввалроқ коронавирус инфекцияси аниқлангани, даволаш муолажалари учун Тошкентга кўчирилгани ҳақида хабар берилган эди.
Изоҳ (0)