Йўл ҳаракати хавфсизлиги бош бошқармаси ахборот хизмати Жиззах вилояти Шароф Рашидов туманидаги Жиззах—Фориш—Қизилча автомобиль йўлида ЙТҲ содир бўлгани ҳақида хабар қилди.
Самарқанд вилояти Ургут туманида яшовчи 25 ёшли ҳайдовчи бошқарувидаги Damas қарама-қарши йўналишга чиқиб кетиб, рўпарадан келаётган бошқа бир Damas’га урилган.
Оқибатда Ғаллаорол туманида яшовчи 21 ёшли ҳайдовчи бошқарувидаги машина ичида бўлган 13 ёшли бола оғир аҳволда шифохонанинг жонлатириш бўлимига ётқизилган.
Ургутлик ҳайдовчининг сўзларига кўра, у Cobalt’ни қувиб ўтмоқчи бўлган ва олдиндаги машина бурилиш сигналини берганидан кейин қарама-қарши йўналиш бўш деб ҳисоблаб, қоидани бузган. Ғаллаороллик ҳайдовчи бошқарувидаги Damas эса ушбу кутилмаган қарорга тайёр бўлмаган.
Аввал Тошкент вилояти Чирчиқ шаҳрида 24 ёшли ҳайдовчи Lacetti’да юқори тезликда ҳаракатланиб дарахтга урилган ва воқеа жойида вафот этгани, Фарғона вилояти Тошлоқ туманида Damas ва «ИЖ» мотоцикли тўқнашуви оқибатида ҳайдовчилардан бири вафот этгани, Тошкентда маст ҳолатда Lacetti ҳайдаган 18 ёшли йигит йўл-транспорт ҳодисасини содир этиб, дўстининг ўлимига сабабчи бўлгани ҳақида хабарлар берилган.
Изоҳ (0)