Тошкентда маст ҳолатда машина ҳайдаган 18 ёшли йигит йўл-транспорт ҳодисасини содир этиб, дўстининг ўлимига сабабчи бўлди. Бу ҳақда ИИВ ЙҲХББ ахборот хизмати хабар берди.
Маълумотларга кўра, 20 август куни соат 23:00 ларда Яккасарой тумани Шота Руставелли кўчасида 18 ёшли Lacetti ҳайдовчиси маст ҳолда ҳаракатланаётиб, рул бошқарувини йўқотган ва йўлни ажратувчи бўлагидаги ёритиш чироқлари ўрнатилган темир симёғочга урилган.
Авария оқибатида автомобиль ичида бўлган 19 ёшли йўловчи оғир тан жароҳатлари олиб воқеа жойида вафот этган. Автомобиль ҳайдовчиси ҳамда яна бир 19 ёшли йўловчи тан жароҳатлари билан шифохонага ётқизилган.
Мазкур ЙТҲ юзасидан Яккасарой тумани ИИО ФМБ ТБ томонидан дастлабки тергов ҳаракатлари олиб борилмоқда.
Маълумот учун, Ўзбекистонда 2020 йилнинг ўтган етти ойи давомида жами 3012 та йўл-транспорт ҳодисаси юз берган. Ушбу ЙТҲлардан ўлим билан якунланган ҳолатлар сони 808 тани ташкил этган, шунингдек, 2204 та ЙТҲда эса тан жароҳати олинган қайд этилган. Аварияларнинг 2,3 фоизи автомобилни маст ҳолатда бошқариш сабабларига кўра юз берган.
Изоҳ (0)