Тошкент вилояти Чирчиқ шаҳрида 24 ёшли ҳайдовчи Lacetti’да юқори тезликда ҳаракатланиб дарахтга урилган ва воқеа жойида вафот этган. Бу ҳақда Йўл ҳаракати хавфсизлиги бош бошқармаси ахборот хизмати хабар қилди.
Воқеа 2020 йил 21 август куни содир бўлган. 1996 йилда туғилган Б.Ў. Чирчиқ шаҳридаги Камолот кўчасида бошқарувида бўлган Lacetti’нинг тезлигини меъёридан оширган ва йўлнинг хавфли бурилиш қисмига етганда бошқарувни йўқотиб дарахтга урилган.
Оқибатда 24 ёшли йигит оғир тан жароҳатлари олиб воқеа жойида вафот этган. Автомобиль йўловчиси 24 ёшли Р.Ш. тан жароҳатлари билан шифохонага ётқизилган.
Мазкур ЙТҲ юзасидан Чирчиқ шаҳар ИИБ ҳузуридаги Тергов бўлими томонидан дастлабки тергов ҳаракатлари олиб борилмоқда.
Аввал Фарғона вилояти Тошлоқ туманида Damas ва «ИЖ» мотоцикли тўқнашуви оқибатида ҳайдовчилардан бири вафот этгани, Қорақалпоғистоннинг Нукус шаҳрида ичида 4 нафар одам бўлган Lacetti тунда электр устунига урилиб ёниб кетгани, Тошкентда маст ҳолатда Lacetti ҳайдаган 18 ёшли йигит йўл-транспорт ҳодисасини содир этиб, дўстининг ўлимига сабабчи бўлгани ҳақида хабар берилган.
Изоҳ (0)