«Auto.ru» сайтида 1952 йилда ишлаб чиқарилган Mercedes-Benz 300 S W188 купеси сотувга қўйилгани тўғрисида эълон пайдо бўлди. 216 нусхада яратилган ушбу ноёб автомобиль 52,5 миллион рублга (735 минг доллар) баҳоланмоқда. Таққослаш учун бунча пул эвазига бешта янги Mercedes-Maybach S-Class харид қилиш мумкин.
Ноёб Mercedes 68 йиллик умри давомида 12 минг километр йўл босган. Моделга 150 от кучига эга уч литрли бензин мотор ўрнатилган бўлиб, у тўрт поғонали механик узатмалар қутиси ёрдамида бошқарилади. Эълон муаллифининг сўзларига кўра, мазкур нусха Kienle фирмаси томонидан реставрация қилинган ва ҳозирда ажойиб ҳолатда. Бундан ташқари, Mercedes-Benz 300 S W188’га янги резина жамланмалари кийдирилган.
S-Class ва SL каби моделларнинг аждоди ҳисобланувчи Mercedes-Benz W188 1951 йили Париждаги автосалонда тақдим этилган. У родстер, купе ва кабриолет кузовида ишлаб чиқарилган: 1952—1954 йиллардан конвейрдан 216 нусха купе, 203 та кабриолет ва 141 дона родстер чиққан.
Аввалроқ 2006 йилда ишлаб чиқарилган Mercedes-Benz CLK DTM AMG кабриолети иккита янги Mercedes-AMG GТ нархида сотилгани тўғрисида хабар берилганди.
Изоҳ (0)