Россия жамоат йўлларида 2021 йилдан бошлаб ҳайдовчисиз бошқариладиган автомобилларни тестдан ўтказиш бошланади, деб хабар қилади IXBT.
Тўлиқ автоном автомобиллар синовини 2020 йилнинг кузида бошлаш режалаштирилган эди, бироқ лойиҳани қолдиришга тўғри келган. Бу ҳақда мамлакат Транспорт, Саноат ва савдо, ИИВ ҳамда Иқтисодий ривожланиш вазирликлари томонидан тайёрланган ҳужжат режасида сўз боради.
Таъкидланишича, мазкур ҳужжат лойиҳаси яқин кунлар ичида кўриб чиқиш учун ҳукуматга киритилади.
Синовларнинг тўхтаб қолишида ҳукуматнинг айби йўқ. Ихтирочилар ҳайдовчиларни суғурта қилмасдан жамоат йўлларида ҳайдовчисиз бошқариладиган автомобилларни тестдан ўтказишга тайёр бўлмаган. Бунда «Яндекс» ягона истиснога айланган. Шунингдек, лойиҳада «КамАЗ», «Сбербанк» ва «ГАЗ» ҳам иштирок этиши режалаштирилган.
«Салонда муҳандис бўлмасдан туриб ҳайдовчисиз бошқариладиган автомобилни синовдан ўтказиш — уни жорий этишдаги муҳим босқич. Лойиҳа тақдири ушбу синовларга боғлиқ», — дейди «Автонет» ишчи гуруҳи вакили Ярослав Федосеев.
Айни вақтда Россия кўчаларида ҳайдовчисиз бошқариладиган автомобиллар муҳандис-ҳайдовчилар орқали синовдан ўтказилмоқда. «Яндекс» ҳам яқинда Мичиганда ўзининг шу турдаги машиналарини синовдан ўтказишни бошлаган. Чунки Американинг ушбу штатида ҳайдовчисиз автомобилларни тестдан ўтказишга рухсат берилган.
Изоҳ (0)