Навоийда маҳалла раиси икки нафар эҳтиёжманд фуқародан 28,5 млн сўмни фирибгарлик орқали қўлга киритгани аниқланди

Навоийда маҳалла раиси икки нафар эҳтиёжманд фуқародан 28,5 миллион сўмни фирибгарлик йўли билан қўлга киритгани фош этилди. Бу ҳақда Бош прокуратура «Дарё»га маълум қилди.

Маълумотларга кўра, Бош прокуратура ҳузуридаги департаментнинг Навоий вилояти Нурота туман бўлими томонидан ўтказилган терговга қадар текширув давомида тумандаги «А» номли МФЙ раисининг кирдикорлари аниқланган. Маҳалла раиси яшаш учун уй-жойи бўлмаган ҳамда эҳтиёжманд оила тоифасига киритилган икки нафар фуқарога хонадон сотиб олиш учун бюджетдан ажратилган маблағлардан 28,5 миллион сўмини уй-жойни таъмирлаб беришга ваъда қилган ҳолда фирибгарлик йўли билан қўлга киритиб, ўз эҳтиёжлари учун ишлатиб юборган.

Терговга қадар текширув давомида маҳалла раиси қилган ишидан пушаймонлик билдириб, етказилган зарарнинг 19 миллион сўмини ўз ихтиёри билан қайтарганлиги процессуал расмийлаштирилган.

Мазкур ҳолат юзасидан маҳалла раисига нисбатан Жиноят кодексининг 168-моддаси 2-қисми «а» банди (фирибгарлик) билан жиноят иши қўзғатилиб, тергов ҳаракатлари ўтказилмоқда.

Аввалроқ Бекободда маҳалла раиси нафақага муҳтож бўлмаган фуқароларга 100 миллион сўмдан ортиқ пул тайинлагани аниқланган эди.

Эслатиб ўтамиз, 4 август куни Президент Шавкат Мирзиёев томонидан ўтказилган видеоселектор йиғилишида маҳалла вазирлиги раҳбарияти фаолияти жиддий танқид қилиниб, қониқарсиз деб баҳоланган эди. 8 август куни бош вазир Абдулла Арипов бошчилигида Вазирлар Маҳкамасида ўтказилган видеоселектор йиғилишида ҳам тизим фаолиятида ишни ташкил этиш борасидаги камчиликлар таҳлил қилиниб, маҳаллалар билан самарали иш ташкил эта олинмагани, натижалар қониқарли эмаслиги туфайли маҳалла тизими раҳбарларига жазо берилган эди. Хусусан, ишда йўл қўйган камчиликлари учун маҳалла ва оилани қўллаб-қувватлаш вазири Раҳмат Маматов, вазир ўринбосарлари Азизбек Икромов ва Ботир Парпиевга ҳайфсан эълон қилинган.