Тошкентнинг Мирзо Улуғбек тумани Мустақиллик шоҳ кўчаси ва Абдулла Қодирий кўчалари кесишмасидаги автотураргоҳ ҳудудида Tenge Bank’нинг маъмурий биносини қуриш режалаштирилмоқда. Атрофдаги уйлар аҳолиси шаҳар ҳокимлиги лойиҳани муҳокама қилмаганидан ва қурилиш оқибатида кўплаб дарахтлар кесилиши мумкинлигидан норози, деб хабар беради «Gazeta.uz».
15 август куни Мирзо Улуғбек тумани ҳокимлиги матбуот хизмати ушбу ҳудуд Тошкент шаҳар ҳокими Жаҳонгир Ортиқхўжаевнинг 2019 йил 26 апрелдаги (593-сонли) қарори билан Мирзо Улуғбек Business City лойиҳаси доирасида Қозоғистон Халқ банкига берилганини маълум қилган. Tenge Bank биносини қуриш Президент Шавкат Мирзиёевнинг Қозоғистонга ташрифи давомида келишиб олинган.
Хабарда айтилишича, банк ёнида маҳаллий аҳоли учун болалар майдончаси ва дам олиш зоналари ҳам қурилади. Мавжуд дарахтларни эса бошқа жойга кўчириш режалаштирилмоқда. Туман ҳокимлигининг маълум қилишича, қурилиш ишларининг бошланиши сентябрга мўлжалланган.
Мирзо Улуғбек тумани ҳокимининг қурилиш бўйича ўринбосари Абдулазиз Абдулҳақов аҳоли билан учрашув вақтида 15 сотих ҳудудда уч қаватли автотураргоҳга эга 20 қаватли бино қад кўтаришини маълум қилган.
Паркент бозори яқинидаги Tenge Bank биноси Қозоғистон банкининг филиалига айлантирилади, янги жойда эса бош офис жойлашади. «Ҳозирда лойиҳа устида ишлар кетмоқда», — дейди у.
Аҳолининг ҳокимият бино қурилишини Вазирлар Маҳкамасининг 2018 йил 18 ноябрдаги (949-сонли) қарорига зид равишда жамоатчилик муҳокамасига қўймагани тўғрисида билдирган эътирозига нисбатан Тошкент ҳокимлиги матбуот котиби Фурқат Маҳмудхўжаев туман ҳокимлиги инвесторлар билан лойиҳани тақдим этишлари ва уни аҳоли билан муҳокама қилишлари кераклигини билдирган.
«Биз шаҳар ҳокимининг қарорини бажарамиз, бироқ ундан юқори турувчи ҳужжатларга 100 фоиз амал қилишимиз керак. Бусиз ҳоким қарори амалга ошмайди», — дейди матбуот котиб.
Абдулазиз Абдулҳақов яқин кунларда учрашув ташкиллаштиришга ваъда берган.
Туман аҳолисининг Ўзбекистон Президентига йўллаган мактубида ёзилишича, амалдаги боғ 2001 йилда туман ҳокимлиги томонидан «Она ва бола йили» муносабати билан қурилган.
«У туманимиз аҳолисининг севимли дам олиш масканига айланиб улгурган. Боғимиз карантин чекловлари енгиллаштирилган ва бошқа боғларга ташриф буюрувчилар кўп бўлган ҳозирги ҳолатда ҳам бизни қутқармоқда», — дейилади мактубда.
Таъкидланишича, боғда 200 га яқин дарахт ва бута ўсмоқда, улардан 50 таси — қимматбаҳо нав, 70 фоиз дарахтнинг ёши 20 дан ошган. Аҳоли дарахтларнинг кўчирилиши уларнинг нобуд бўлишига олиб келишидан хавотирда.
Март ойида Tenge Bank янги бинонинг қурилишига оид режаларга изоҳ бериб, Тошкент шаҳрининг яшил фондини сақлаб қолишдан манфаатдор эканликлари ва яшил ҳудуддаги дарахтларнинг нобуд бўлмаслиги таъминланишини кафолатлаган эди.
«Ўзбекистон пойтахтининг экологик гуллаб-яшнашидан манфаатдор бўлган инвестор сифатида биз шаҳар ҳокимияти томонидан ажратилган жойда керакли миқдордаги дарахтларни экишга тайёрмиз», — дейилади баёнотда.
Изоҳ (0)