Тошкентнинг Яшнобод туманида жуда кўп миқдордаги маблағни ўзлаштирган собиқ ширкат раҳбарига нисбатан жиноят иши қўзғатилди. Бу ҳақда «Дарё»га Бош прокуратура матбуот хизмати хабар берди.
Департаментнинг Яшнобод тумани бўлими томонидан тумандаги «И-К.» хусусий уй-жой мулкдорлари ширкати раҳбарининг мурожаатига асосан ўтказилган терговга қадар текширувда аниқланишича, фуқаро О.Д. 2016—2018 йилларда ширкат директори лавозимида ишлаб келиб, турмуш ўртоғи Ш.нинг номига «Т.с.» МЧЖ ва таниши С.нинг номига «Т.м.» МЧЖларни ташкил қилиб, жамиятлар фаолиятини норасмий ўзи бошқариб келган.
2017 йилда банкдан ширкатга қарашли кўп қаватли уйларни жорий таъмирлаш учун 461,2 миллион сўм кредит расмийлаштиришга эришиб, юқоридаги МЧЖлар ўртасида пудрат шартномалари тузган. Шундан сўнг далолатномаларга 229,3 миллион сўмлик ишлар бажарилганлиги тўғрисида сохта маълумотларни қўшиб ёзиб жуда кўп миқдордаги мулкни ўзлаштириш йўли билан талон-торож қилган.
Мазкур ҳолат юзасидан О.Д. ва бошқаларга нисбатан Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш), 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 1-қисми ва 3-қисми билан жиноят иши қўзғатилиб, тергов ҳаракатлари ўтказилмоқда.
Мавзуга доир:
Изоҳ (0)