Ўзбекистон пандемия шароитига қарамай Россия билан товар айланмасини 18 фоизга ошира олди. Бу ҳақда Россия саноат ва савдо вазирлиги матбуот хизмати хабар берди.
Хабарга кўра, 19 август куни Ўзбекистон инвестициялар ва ташқи савдо вазири Сардор Умурзоқов Москвада Россия саноат ва савдо вазири Денис Манутров билан учрашган.
Учрашувда пандемия шароитига қарамай, 2020 йилнинг биринчи ярмида Россия ва Ўзбекистон савдо-иқтисодий ҳамкорлиги ижобий натижа кўрсатгани қайд этилган. Хусусан, 2020 йилнинг январида савдо ҳажми 18 фоизга, Россиянинг Ўзбекистонга экспорти эса 24,5 фоизга ўсган.
Шунингдек, томонлар савдо-иқтисодий ҳамкорлик ва саноат кооперацияси ҳақида меморандум имзолаган. Ҳужжатнинг асосий мақсади икки мамлакат орасида ўзаро манфаатли бўлган савдо-иқтисодий ҳамкорликни ривожлантиришдир. Унда икки давлат ишбилармон доиралари орасида учрашувлар ташкил қилиш, қўшма корхоналар ташкил қилиш, саноат ва савдо соҳаларида икки томонлама инвестицион лойиҳалар амалга ошиши учун қулай шароитлар яратиш кўзда тутилган.
Аввалроқ 2020 йилнинг январь—июнь ойлари якуни бўйича Ўзбекистоннинг ташқи савдо айланмаси 18,2 фоизга камайгани хабар берилган эди.
Изоҳ (0)