Ўзбекистонда хавфсиз, тартибли, қонуний меҳнат миграциясини назарда тутувчи янги тизим яратилмоқда. Унинг йўналишларига кирувчи ишларни амалга ошириш учун жами 300 миллиард сўм маблағ ажратилган.
Бу ҳақда Бандлик ва меҳнат муносабатлари вазирининг биринчи ўринбосари Эркин Муҳитдинов Халқаро пресс-клубнинг навбатдаги сессиясида маълум қилди.
Янги тизим қуйидаги йўналишларни назарда тутади:
- Хорижга кетишдан аввал фуқарони касб ва тилга тайёрлаб бориш. Бу бўйича катта тизим яратилмоқда, 200 га яқин касб-ҳунар марказлари шу тизимга хизмат қилади. Фуқароларни 20 дан ортиқ касбга ва хорижий тилга ўқитади;
- Мигрантнинг хорижга кетиш харажатларини имтиёзли равишда молиялаштириш дастури кенгайтирилади. Суғурта полиси, кредит сони кенгайтирилади;
- Фуқаролар билан хорижда ҳам алоқани сақлаб туриш. Ташқи меҳнат миграцияси агентлиги ваколатхона тизими кенгаймоқда. Улар томонидан мигрантларга ҳуқуқий, моддий-ижтимоий ёрдам тизими кенгаяди. Бунинг учун ўша давлатлардаги ҳуқуқий ташкилотлари, адвокатлик компаниялари ичида танлов амалга оширилади Танлов ғолиби шартнома бўйича фуқароларнинг ҳуқуқларини ҳимоя қилиши кўзда тутилади. Уларнинг гонорари Хориждаги фуқароларни ҳимоя қилиш жамғармаси томонидан тўланади.
- Мигрантларнинг қайтиб келганидан кейин маҳаллий меҳнат бозорига реинтеграция қилиш, бандлигини таъминлаш. 2020 йилнинг ўзида 100 мингга яқин мигрантлар бандлиги таъминланган. Йил охиригача 110 минг нафарини таъминлаш кўзда тутилган. Булар бўш вакансиялар, вақтинчалик жамоат ишлари, тадбиркорликка жалб қилиш дастури асосида, ўз-ўзини банд қилиш, яна кетиш истаги бўлган фуқароларни касбга ўқитиб хорижий миграцияга юбориш ва ҳоказо.
Шунингдек, фуқароларни нафақат Ўзбекистон, балки хорижда ҳам касб-ҳунарга ўқитиш режаси бор. Россиянинг 5 та йирик шаҳридаги 53 та касб-ҳунар коллежи билан келишган ҳолда касбий, рус тили бўйича билими етмаган тақдирда Россия ва «World Skills» уюшмаси методикаси Россия Халқлар дўстлиги университети билан ҳамкорликда рус тили бўйича ўқитилади.
Шунингдек, вазир ўринбосари ҳозирги вақтда Ўзбекистоннинг ҳар бир ҳудудида кассалар очилиб, авиачипталар ва темир йўл чипталари меҳнат мигрантларига имтиёзли сотилаётгани, автобуслар йўлга қўйилгани, 200 мингга яқин фуқарога хизмат қилиниб, 70 мингта суғурта полиси берилганини қўшимча қилди. 2019 йилдан бошлаб мазкур полислар бепул берилмоқда. Йўлга боғлиқ харажатларни қоплаш учун имтиёзли кредит ҳам берилишни бошлангани таъкидланди.
Изоҳ (0)