Бош прокуратура ҳузуридаги департаментнинг Фарғона шаҳар бўлими томонидан ўтказилган терговга қадар текширувда 4,5 миллиард сўм кредит маблағни талон-торож қилган шахслар аниқланди. Бу ҳақда Бош прокуратура матбуот хизмати «Дарё»га маълум қилди.
Маълумотларга кўра, «Х» хусусий корхонаси раҳбари Н.И. ва фуқаро А.Ш. ноқонуний даромад орттириш мақсадида олдиндан тил бириктириб, банкдан ажратилган 4,5 миллиард сўм кредит маблағини А.Ш.нинг банк пластик картасига ўтказиб, ўзлаштириш йўли билан талон-торож қилган.
Хусусан, Н.И. ва А.Ш. пластик картасига ўтказилган кредит маблағи ҳисобидан 820,4 миллион сўмни «Қ» МЧЖнинг кредит тўлови учун ўтказган. Қолган пул маблағларини эса тижорат банклари банкоматлари орқали нақдлаштириб, фуқаро Ш.дан 40 дона ва фуқаро Т.дан 7 дона турли русумдаги енгил автомашиналарни сотиб олиб, жиноий фаолиятдан олинган даромадларини легаллаштирган.
Мазкур ҳолат юзасидан «Х» хусусий корхонаси раҳбари Н.И., фуқаро А.Ш. ва бошқаларга нисбатан Жиноят кодексининг 167-моддаси 3-қисми «а» банди (ўзлаштириш ёки растрата йўли билан талон-торож қилиш) ва 243-моддаси (жиноий фаолиятдан олинган даромадларни легаллаштириш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)