Қашқадарё вилоятида Э.З. исмли нафақахўр аёл 26 ёшли ўғли Н.Ш.ни болға билан уриб, тан жароҳати етказди. Бу ҳақда Қашқадарё вилояти ИИБ ахборот хизмати хабар қилган.
Қайд этилишича, 2020 йил 1 август куни соат 01:30 ларда Қарши тумани «Жумабозор» маҳалласида яшовчи Н.Ш. маст ҳолда нафақахўр онаси Э.З.дан Damas машинаси ва уй-жойларни номига ўтказиб беришни сўраган.
Она ва бола ўртасидаги суҳбат тезда даҳанаки айтишувга айланган. Ўғил онасини оғизга олиб бўлмайдиган сўзлар билан ҳақорат қилган ва ўртада жанжал келиб чиққан. Жанжал вақтида Э.З. қўлига темир болға олиб ўғли Н.Ш.нинг бош қисмига уриб тан жароҳати етказган.
Бошқарма маълумотида, Э.З.нинг соғлиғи, жароҳатнинг қандай даражада эканлигига аниқлик киритилмаган.
Аввалроқ Наманган шаҳрининг «Янги замин» маҳалласида 2020 йил 13 июнь куни рўй берган жанжал оқибатида 44 яшар эркак 36 ёшли турмуш ўртоғининг бош ва бўйин соҳасига болта билан уриб уни ўлдиргани, вояга етмаган фарзандлари — 10 ва 8 ёшли қизлари, шунингдек, 4 ойлик чақалоғига тан жароҳати етказган ва ўзини ёқиб юборган. Кейинчалик оилавий можаро оқибатида оғир жароҳат олган опа-сингиллар жонлантириш бўлимидан чиққани, қизлар бир муддат даволанишдан сўнг болалар шифохонаси неврология бўлимига юборилиши ва психологлар кузатувида бўлиши хабар қилинганди.
14 августда эса Наманган вилояти Янгиқўрғон туманида оилавий жанжал оқибатида келинини урган ва унга тан жароҳати етказган қайнотага нисбатан жиноят иши (2020 йил 11 августда) очилгани ҳақида хабар қилинган.
Изоҳ (0)