Ўзбекистонда коронавирусга қарши курашга жалб қилинган шифохоналар ҳамда карантин марказларида кунлик овқатланиш учун ажратиладиган харажатлар миқдори қатъий белгиланди. Бу ҳақда Соғлиқни сақлаш вазирлиги хабар берди.
«Жаҳон соғлиқни сақлаш ташкилотининг тавсияларига кўра, тўғри ва соғлом овқатланиш даволанишнинг муҳим қисми ҳисобланишини ҳамда Санитария-эпидемиологик осойишталик ва жамоат саломатлиги хизмати тавсияларини инобатга олиб, шунингдек, беморлар ва карантинга олинган шахсларни овқатлантиришда ортиқча исрофгарчиликларнинг олдини олиш мақсадида Республика махсус комиссиясининг 2020 йилнинг 17 августидаги тегишли йиғилиш баёнига мувофиқ кунлик овқатлантириш харажатлари меъёрлаштириштирилди», — дейилади вазирлик хабарида.
Маълум қилинишича, коронавирус инфекциясига қарши кураш тадбирларига жалб қилинган барча муассасалар ва карантин марказларида бюджет ва Инқирозга қарши курашиш жамғармаси маблағлари ҳисобидан молиялаштириладиган аутсорсинг хизмати орқали кунлик овқатлантириш харажатлари 2020 йилнинг 20 августидан бошлаб Тошкент шаҳри ва Тошкент вилоятида 35 минг сўмгача ҳамда бошқа ҳудудларда 30 минг сўмгача бўлган миқдорда белгиланди.
Ушбу белгиланган нархлардан ошмаган ёки камроқ нархларда овқатлантириш ташкиллаштирилган ҳолатларда ўша белгиланган миқдорларда аутсорсинг хизмати орқали кунлик овқат етказиб берувчи хўжалик субъектлари билан тузилган шартномага асосан фаолиятни давом эттириш тавсия этилади.
«Юқорида қайд этилган меъёрларга мувофиқ, аутсорсинг хизмати орқали етказиб берувчи хўжалик субъектлари билан тузилган шартномага асосан кунлик овқатлантириш меъёри ва озиқ-овқат маҳсулотларининг сифати ва соғлиқ учун фойдалилиги талаб даражасида бўлишига эътибор қаратиш лозим», — дейилади хабарда.
Бюджетдан ташқари ва бошқа маблағлар ҳисобидан овқатлантириш ташкил этилганда кунлик овқатлантириш харажатлари миқдорлари эркин нархларда белгиланиши ҳамда Санитария-эпидемиологик осойишталик ва жамоат саломатлиги хизмати томонидан кунлик овқатлантириш меъёрлари қайта кўриб чиқилиши мумкин.
Аввалроқ Тошкент вилоятининг Юқори Чирчиқ туманида жойлашган «Ўртасарой» карантин мажмуасида сақланаётган шахслар мажмуадаги вазиятдан норозилигини билдирганди.
Изоҳ (0)