Хоразмда 20 минг доллар пора сўраган бўлим бошлиғига жиноят иши қўзғатилди. Бу ҳақда Бош прокуратура матбуот хизмати хабар берди.
Департамент ва ДХХнинг Хоразм вилоят бошқармалари томонидан тадбиркорлик субъектларининг қонуний ҳуқуқ ва манфаатларини ҳимоя қилиш юзасидан тезкор тадбир ўтказилган.
Унда Тупроққалъа тумани ер ресурслари ва давлат кадастри бўлими бошлиғи М.Р. «Д» МЧЖнинг иш юритувчиси Р.дан жамиятга тумандаги Гурлан массиви ҳудудидан балиқчилик кўли ташкил қилиш учун 15 гектар ер майдони ажратиб бериш эвазига 20 минг доллар пора талаб қилиб олган вақтида ашёвий далил билан ушланган.
Мазкур ҳолат юзасидан М.Р.га нисбатан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
«Давергеодезкадастр» қўмитаси ҳолат бўйича қўшимча маълумотларни тақдим этди. Билдиришича, Р.М 2020 йил 13 майида Хоразм вилоят ер ресурслари ва давлат кадастри бошқармасининг Тупроққалъа тумани бўлими бошлиғи лавозимига тайинланган бўлиб, у бунга қадар 2019—2020 йилларда Вазирлар Маҳкамаси ҳузуридаги Агросаноат мажмуи устидан назорат қилиш инспекциясининг Хоразм вилояти Хазорасп тумани бўлими инспектори лавозимида фаолият юритган.
Хабарда келтирилган 15 гектар ер майдони Р.М.нинг акаси Б.У.га тегишли сунъий балиқ ҳовузи бўлган. Р.М. ушбу ер майдонини «Д» МЧЖ номига ўтказиб беришни ваъда қилиб пул маблағи сўраганлиги аудио ёзув билан тасдиқланган ва Бош прокуратура ҳузуридаги департамент ва ДХХнинг Хоразм вилоят бошқармаси томонидан қўлга олинган. Бугунги кунда Р.М.га нибатан қамоқ эҳтиёт чораси қўлланилган.
Қўмита, шунингдек, бу жараёнда ер майдонини ажратиш қандай бўлиши кераклигига ҳам тўхталиб ўтган. Унга кўра, Б.У. номида бўлган 15 гектар сунъий балиқ ҳовузи туман ҳокимлиги захирасига қайтарилиши ва ундан сўнг мазкур ер майдони белгиланган тартибда танловга қўйилиб, танлов ғолибига туман ҳокимининг қарори билан ажратилиши ва Ер кодексининг 5-моддаси бешинчи хатбошисига асосан «юридик шахсларга қишлоқ хўжалик эҳтиёжлари ҳамда бошқа давлат ва жамоат эҳтиёжлари учун эгалик қилишга, фойдаланишга ва ижарага ер бериш» вилоят ҳокимининг қарори билан тасдиқланиши лозим бўлган.
Мавзуга доир:
Изоҳ (0)