Ҳисоб палатаси Мактабгача таълими вазирлиги тизимидаги ташкилотларнинг 2018—2019 йиллардаги бюджет ва бюджетдан ташқари маблағлардан фойдаланиш самарадорлиги ҳамда 2020 йилги харажатларини мақбуллаштириш имкониятлари юзасидан ўрганиш ўтказди. Бу ҳақда палата матбуот хизмати хабар берди.
Ўрганишлар вазирликнинг Ички аудит ва молиявий назорат хизмати билан ҳамкорликда олиб борилган. Натижада мазкур тизим ташкилотлари томонидан жами 48,3 миллиард сўмлик молиявий хато ва камчиликларга йўл қўйилганлиги аниқланган.
Жумладан, тизимда хизмат кўрсатувчи ходимларнинг ойлик иш ҳақи учун ажратилган маблағларнинг 7,2 миллиард сўми қуйи бўғинлардаги айрим мансабдорлар томонидан йўл қўйилган ноқонуний ўзлаштириш, ортиқча тўловлар ва ўғрилик натижасида талон-торож қилинган.
Сохта таомномалар тузиб, ҳақиқатда сарфланмаган озиқ-овқат маҳсулотларини харажатга чиқариш ва камомадларга йўл қўйиш орқали 3,6 миллиард сўмлик маблағ ноқонуний ўзлаштирилган.
Сариёғ сифатида 2,2 миллиард сўмлик истеъмолга яроқсиз «Спред» (ўсимлик мойи ва сут ёғининг аралашмаси) ва ёғлилик даражаси меъёрдан паст бўлган сариёғ маҳсулотлари, 10,1 миллиард сўмлик ветеринария назоратидан ўтказилмаган 309,4 тонна гўшт маҳсулотлари харид қилиниб, тарбияланувчиларнинг овқатланиши учун сарфланган.
Тарбияланувчилар сонини яшириш, ота-оналар тўловларини кассага кирим қилмаслик орқали 497,7 миллион сўм маблағлар ноқонуний ўзлаштирилган.
Харидларнинг рақобатга асосланган усулларини четлаб ўтиб, «Давлат харидлари тўғрисида»ги қонун талабларига зид равишда 253 та ҳолатда 11,3 миллиард сўмлик шартномалар тузилган.
Бундан ташқари, харид қоидаларини бузган ҳолда қиммат нархларда ҳамда стандартга жавоб бермайдиган 8,8 миллиард сўмлик товар-моддий бойликлар харид қилинган.
Тизимда амалга оширилган ўрганиш натижаси бўйича аниқланган ҳолатларни бартараф этиш ва уларни келгусида такрорламаслик юзасидан Ҳисоб палатаси томонидан 26 та йўналиш бўйича 75 та таклиф ишлаб чиқилди, тизим ташкилотларига тегишли кўрсатмалар берилди.
Ушбу таклифлар асосида Мактабгача таълим вазирлиги томонидан тегишли вазирлик ва идоралар билан биргаликда «йўл харитаси» ишлаб чиқилиши белгиланди.
Амалдаги 16 та меъёрий-ҳуқуқий ҳужжатга ўзгартиришлар киритиш, молиявий ва услубий йўналишларни ўзида бирлаштирадиган ахборот тизимини такомиллаштириш бўйича таклифлар берилди.
Изоҳ (0)