20 август куни Олмалиқдаги «Металлург» спорт мажмуасининг стадионида Москва пўлат ва қотишмалар институтининг («МИСиС») Олмалиқ филиалига кириш имтиҳонлари ўтказилди. Бу ҳақда «Gazeta.uz» хабар берган.
Филиалга кириш учун имтиҳонлар 20—22 август кунларига белгиланган, абитуриентлар математика, физика, информатика ҳамда рус тили фанларидан ёзма тарзда имтиҳондан ўтказилади.
Спорт мажмуасининг умумий майдони 7 гектарни ташкил этади, имтиҳон ўтиши режалаштирилган майдоннинг параметрлари 70 метрга 90 метр. Ўйингоҳга кириш жойлари 5 та, шундан иккитасидан имтиҳон пайтида қўлланилади. Шунингдек, кириш йўлларига иккита дезинфекция туннели ўрнатилган.
Хабарга кўра, имтиҳонлар вақтида абитуриентлар бир кишидан, ўзаро оралиқ масофани 2 метр қилиб жойлаштирилган. Имтиҳонларнинг юқори савияда ўтказилишида карантин қоидаларига риоя этилиши, бевосита «ОКМК» АЖ ҳамкорлигида ишлаб чиқилган «Йўл харитаси»га асосан ташкил этилган.
Миллий технологик тадқиқотлар университети «МИСиС»нинг Олмалиқ шаҳридаги филиали учун 2020/2021-ўқув йилида кундузги ва сиртқи таълим шакли бўйича белгиланган қабул квотаси 250 тани ташкил этади. Филиал томонидан 2020 йилнинг 20 июнидан 31 июлигача масофавий тарзда 1309 нафар абитуриентдан ҳужжатлар қабул қилинган. Рўйхатдан ўтганлар сони кундузги таълим шакли бўйича 790 нафар, сиртқи таълим шакли бўйича 519 нафарни ташкил этади.
«МИСиС»нинг Олмалиқ филиалида Металлургия (металл технологияси), Автоматлаштириш ва технологик жараёнлар ва ишлаб чиқаришни бошқариш (тармоқлар бўйича) ҳамда Кончилик таълим йўналишлари бўйича амалга оширилади.
Эслатиб ўтамиз, Ўзбекистон ОТМларига кириш имтиҳонлари 2 сентябрда бошланади ва икки ҳафта давом этади. Олий ва ўрта махсус таълим вазирлиги матбуот хизмати «МИСиС» — халқаро университет филиали бўлгани сабабли имтиҳон кунини хорижий ҳамкори билан келишган ҳолда белгилаганини маълум қилган.
Мавзуга доир: Ўзбекистонда ОТМларга кириш имтиҳонлари ўтказиладиган стадион ва хиёбонлар рўйхати эълон қилинди
Хавфсизликни таъминлашга Ички ишлар вазирлиги, Миллий гвардия, Фавқулодда вазиятлар ва Соғлиқни сақлаш вазирлиги ходимлари, турғун ва қўлда олиб юрувчи металлодетекторлар, транспорт ва алоқа воситалари ҳамда хизмат итлари жалб этилади. Фавқулодда ҳолатларнинг олдини олиш мақсадида ҳар бир кучишлатар тизимида хизматга жалб этиш учун захира кучлари шакллантирилади.
Изоҳ (0)