Бухорода вилоят ИИБ ахборот хизмати раҳбари, бошқарма бошлиғининг матбуот котиби ўзгарди. Бу ҳақда вилоят ИИБ бошлиғи Шуҳрат Алиев иштирокидаги матбуот анжуманида маълум қилинди, дея хабар берди «Дарё» мухбири.
Матбуот анжуманида таъкидланишича, вилоят ИИБ ахборот хизматининг собиқ раҳбари Қувват Ярашов бошқа лавозимга тайинлангани сабабли ушбу вазифани вилоят ИИБда ташкилий бошқарма бошлиғи лавозимида ишлаб келган подполковник Шуҳрат Жалолов бажаришга киришган.
«Маълумки, тизимда оммавий ахборот воситалари билан ишлайдиган, шунингдек, ИИБ фаолияти ҳамда амалга оширилаётган ишларни тезкорлик билан оммага етказиш бўйича янги лавозим жорий этилган. Муҳтарам Президентимиз эътибори ва ички ишлар вазири қарори билан ахборот хизмати раҳбари лавозими ташкилот раҳбари ўринбосарига тенглаштирилган», — деди Шуҳрат Алиев.
Қўшимча қилинишича, матбуот анжуманида тажрибали журналист ва блогерлар вилоят ИИБ ахборот хизматига шартнома асосида ишга таклиф қилинган.
«Очиқлик ва шаффофликни таъминлашда, жамоатчилик назоратини кучайтиришда оммавий ахборот воситалари ходимларининг ўрни катта. Шунга кўра, оммавий ахборот воситаларида фаолият кўрсатаётган ходимларни ўз иш жойидан бўшамаган ҳолда шартнома асосида ишга қабул қилиш чораларини кўриб чиқмоқдамиз. Уларга тўланадиган маош миқдори икки ярим миллиондан беш миллион сўмга етади», — деган вилоят ИИБ бошлиғи.
Матбуот анжуманида журналист ва блогерларга тизимда ОАВ билан ҳамкорликда ишловчилар ҳам таништирилган. Туман ва шаҳарларда эса ИИБ бошлиғи ўринбосарлари журналист ва блогерларга ахборот беришга масъул эканлиги таъкидланган.
Изоҳ (0)