Беларусь президентлигига номзод Светлана Тихановская Европа Кенгашига видеомурожаат билан чиқди. Видео YouTube’даги «Страна для жизни» каналида инглиз тилида эълон қилинган. Унда Тихановская Беларусда бўлиб ўтган президентлик сайлови натижаларини тан олмасликка чақирди.
Ҳурматли Европа етакчилари.Менинг халқим икки ҳафтадан буён ўз раҳбарларини танлаш бўйича конституциявий ҳуқуқлари учун тинч курашмоқда. 9 август куни бўлиб ўтган сайловлар ҳаққоний ҳам, шаффоф ҳам бўлмаган. Натижалар сохталаштирилган. Ўз овозларини ҳимоя қилиш учун Беларусь бўйлаб шаҳар кўчаларига чиққан одамлар шафқатсизларча калтакланган, ҳибсга олинган, ҳокимиятга қаттиқ тирмашган тузум томонидан қийноққа солинган. Бу айни дамда Европа марказида юз бермоқда.
Мен барчангиздан бу сохталаштирилган сайловларни тан олмасликни сўрайман. Лукашенко халқимиз ва бутун дунё олдида ҳар қандай легитимликни йўқотди. Ҳукумат трансферини амалга ошириш мақсадида Беларусда мувофиқлаштирувчи кенгаш тузиш ташаббуси билан чиқдим.
У ҳокимиятни тинч йўл билан мулоқот орқали топшириш жараёнига бош бўлади. У зудлик билан халқаро кузатувчилар иштирокидаги янги, адолатли ва демократик президентлик сайловини эълон қилади.
Ҳурматли Европа давлатлари раҳбарлари, сизларни Беларуснинг ҳаракатини қўллаб-қувватлашга чақираман. Беларусь Республикаси суверенитети ва Беларусь халқи танловини ҳурмат қилишга чақираман.
Эслатиб ўтамиз, Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди. Шундан буён мамлакатда норозилик намойишлари ва намойишчиларни қўллаб-қувватлаш учун чиқишлар давом этмоқда.
Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,08 фоиз овоз тўплаган. Мухолифат номзоди Светлана Тихановская эса расмий маълумотларга кўра, 10,09 фоиз овоз олган.
Натижалар эълон қилингач, Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
Telegram 15 август куни Telegram мессенжери 15 август куни Беларусдаги сайловлар борасида расмий каналини ишга туширди. Сўровномада қатнашганларнинг ярмидан кўпи Светлана Тихановскаяга овоз берганликларини белгилаган. Тихановскаянинг ўзи эса миллий етакчи бўлишга тайёрлигини билдирди.
Аввалроқ Европа парламенти Лукашенкога Персона нон грата мақомини бергани, Канада ва Ирландия Беларусдаги президентлик сайловида Александр Лукашенко ғалаба қозонганини тан олишдан бош тортгани хабар берилган эди.
Изоҳ (0)