Ўзбекистонда беш ойдан буён коронавирусга чалинган беморларни даволовчи тиббиёт муассасасида қолиб ишлаётган тиббиёт ходимлари 14 кунлик «вахта» усулида ишламоқда. Соғлиқни сақлаш вазирлигининг маълум қилишича, мазкур тиббиёт ходимлари кунлик келиб-кетиш тизимига ўтиш бўйича ўз таклифларини билдирмоқда.
Қайд этилишича, Россия, Туркия, Германия, Хитой, Корея ва бошқа ривожланган мамлакатлар экспертлари ҳам коронавирус инфекциясига чалинган беморларни даволашга мўлжалланган саралаш ва провизор шифохоналари ҳамда коронавирус инфекциясини аниқлаш лабораториялари ходимлари иш режимини уларнинг санитария ва гигиена қоидаларига қатъий риоя қилган ҳолда кунбай келиб-кетиш тизимига ўтказилишига ижобий муносабат билдирган.
Юқоридаги таклиф ва тавсиялардан келиб чиқиб, Республика махсус комиссиясининг 2020 йилнинг 17 августидаги тегишли йиғилиш баёнига кўра, 20 август санасидан кунбай иш тартибига ўтилади.
Маълум қилинишича, шу санадан бошлаб коронавирус инфекцияси билан касалланган беморларни даволаш ишларига жалб қилинган ҳамда ушбу инфекцияни аниқлаш лабораторияси ходимлари 14 кунлик «вахта» усулидан санитария ва гигиена қоидаларига қатъий риоя қилган ҳолда кунбай келиб-кетиш тизимига ўтади.
Иш ҳажмидан келиб чиқиб, 6 кунлик кунбай ишлаш мумкинлиги белгиланган ҳолда ҳар 30 кун учун бир ойлик иш фаолияти якуни бўйича:
- шифокорларга 25 миллион сўм;
- ўрта тиббий ходимларга 15 миллион сўм;
- кичик тиббий ходимларга 10 миллион сўм;
- бошқа ходимларга 5 миллион сўм миқдорида махсус рағбатлантириш тўловлари (даромад солиғидан ташқари) тўланиши белгиланди.
Ўзбекистонда коронавирусга чалинган беморларни даволовчи тиббиёт ходимлари шу пайтгача 14 кунлик фаолиятга жалб қилинаётганди, шундан сўнг уларнинг ўзлари карантинга жойлаштирилаётганди. Мамлакатда коронавирус қайд этилган дастлабки кунлардан бошлаб касалликка қарши курашга жалб қилинган тиббиёт ходимларига 14 кунлик иш учун юқорида қайд этилган миқдорда рағбатлантирувчи тўловлар тўланаётганди.
Бундан ташқари, коронавирусга чалинган ва гумон қилинган беморларни тақсимлаш марказларида ишлайдиган тиббиёт ходимларининг иши 15 кунлик навбатчилик тартибида ташкил қилинади ва уларга маошларни кунлик тўлаш тартиби ҳам жорий қилинган.
Изоҳ (0)