Ташқи меҳнат миграцияси агентлиги матбуот котиби Ортиқхўжа Норов Жанубий Кореядан Ўзбекистонга таътилга келган фуқаролар Кореяга киришга рухсат берилгач, қайтиб кетиш учун қандай жараёнлардан ўтиши кераклигини маълум қилди.
Норов пандемия даврида Корея Республикаси ҳудудига киришга рухсат олиш учун 14 кунлик мажбурий карантин талабларига риоя қилиш бўйича розилик битимида иш берувчи билан келишган ҳолда карантин манзилини кўрсатиш шартлигини билдирди. Бунда карантин манзили ID картадаги охирги қайд этилган манзилга яқин ҳудудда бўлиши талаб этилади. Шунингдек, маълумотларни таътилга келган фуқаролар учун очилган @tatil2020 Telegram манзилига корейс тилида юбориш айтилди.
Бундан ташқари, иш берувчи билан мунтазам алоқада бўлиб туриш ва www.eps.go.kr сайтидаги шахсий кабинет маълумотларини текшириб бориш тавсия этилади. Шахсий кабинетдаги маълумотлар ўзгарса, яъни меҳнат шартномаси иш берувчи томонидан бекор қилинган тақдирда бу ҳақда Ташқи меҳнат миграцияси агентлигига хабар берилиши лозим.
Меҳнат шартномаси бекор қилинган ва виза амал қилиш муддати тугамаган фуқаролар шартнома рад этилган кундан бошлаб 1 ой муддатда Корея Республикасига кириб бориши ёки Ташқи меҳнат миграцияси агентлигининг Кореядаги ваколатхонасига (+8270 4252 2772) мурожаат этиши керак.
Корея Республикасининг Ўзбекистондаги элчихонаси томонидан тавсия қилинган тиббиёт муассасаларида жўнаб кетишдан 48 соат олдин коронавирусга тест топшириш белгиланган. Агар фуқарода Корея ҳудудига кириб боргач коронавирус инфекцияси аниқланса, у махсус шифохонада ўз ҳисобидан даволанади.
Матбуот котиби фуқаро томонидан нотўғри маълумотлар берилиши унинг Корея Республикаси ҳудудига кириши учун тақиқ қўйилишига сабаб бўлиши мумкинлигини таъкидлади.
Изоҳ (0)