Қашқадарё вилоятининг Қамаши туманида раҳбарлик қилувчи Шерали Санаев пахта терим машинасини сотиб олмаган фермерни калтаклаган. Бу ҳақда «Дарё»га маълум қилган 62 ёшли фермер Зиёдулла Жабборовнинг айтишича, воқеа 2020 йил 17 август куни ҳокимлик биносида содир бўлган.
«Ўша куни (2020 йил 17 август назарда тутилмоқда) даламда ишлаб юргандим, ‘участкавой’ Ғиёс телефон қилиб, туман ИИБ бошлиғи сўраётганини айтди. Нима гап тинчликми десам, ‘борганда биласиз’ деди. ‘Участкавой’ туман ИИБ бошлиғи билан гаплаштирди. ИИБ бошлиғи эса туман марказига боришимизни айтди. Бордик. Борсак, туман ҳокимлиги залига киритишди. Биз иккита фермер залга бирга кирдик. Залга киришимиз билан ҳоким бизни оғизга олиб бўлмайдиган сўзлар билан ҳақорат қила бошлади. ‘Нимага пахта терим машинасини сотиб олмаясизлар?’, деди. Шунда мен ҳоким бува мен пахта терим машинасини олмайман деганман, ҳатто ерни топшириш учун ариза ҳам берганман дегандим. ‘Уруғлик ғалла учун пул оляпсан-ку’ деди. Уруғлик ғалла учун пул олсам, меҳнатим учун олаётганимни айтдим. ‘Қани келаси йил олиб кўр-чи’ деди. Керакмас дедим. Шунда жаҳл билан келиб, кўкрагимга зарб билан урди. Тўғриси, уради деб кутмагандим», — дейди фермер Зиёдулла Жабборов.
Зиёдулла Жабборовнинг айтишича, бу воқеа юз берган пайтда ҳокимлик залида туман прокурори, ИИБ бошлиғи, Солиқ бошлиғи ва ‘учаткавой’дан ташқари яна бир фермер ҳам бўлган.
«Ҳоким менга қўл кўтаргач, менинг ҳам жаҳлим чиқди ва сўкиниб ҳоким томонга қараб ҳаракатландим. Аммо мени ушлаб қолишди, — дейди фермер. — Ҳокимга аввал менинг ёшимга етишини, ўзидан катта инсонга қўл кўтариб, мансабини суиистеъмол қилмаслиги кераклигини айтдим».
Фермернинг айтишича, у калтаклангач кўкрак қисмида оғриқ пайдо бўлган ва ўзини ёмон ҳис қилган. Шу боис, туман тиббиёт бирлашмасига текширувдан ўтиш учун борган.
«Фазлиддин Умаров деган шифокор ‘сизда ҳеч қандай муаммо йўқ’ деб текширувдан ўтказмади. Шунинг учун Қарши шаҳридаги хусусий клиникадан текширувдан ўтдим», — дейди фермер.
Ҳоким томонидан калтакланганини айтаётган фермер Зиёдулла Жабборов пахта терим машинаси билан боғлиқ машмаша воқеадан бир неча кун илгари кўтарилганини, ўшанда у масъулларга пахта терим машинаси сотиб олиш фикри йўқлигини, агар ерни топширишларини истаса, топширишини айтиб, ариза ёзиб берганини таъкидламоқда.
«Ҳоким мени уришидан олдин у билан кўришгандим. Машина трактор парки (МТП) раиси ва фермерлар кенгаши раҳбари пахта терим машинаси сотиб олишим лозимлигини, буни ҳоким сўраётганини айтганди. Ўшанда уларга кексайиб қолганимни, пахта терим машинаси сотиб ололмаслигимни айтгандим», — дейди фермер.
Зиёдулла Жабборовнинг ерни топшириш ҳақидаги аризасини туман фермерлар кенгашининг Жасур исмли раиси қабул қилиб олган.
Воқеа ҳақида Қамаши туман ҳокимлиги ахборот хизмати раҳбари Нурбек Расуловга маълум қилиб, ҳокимнинг бу ҳақдаги фикри билан қизиқдик.
«Бундай воқеа бўлмаган экан», — деди ҳокимлик ахборот хизмати раҳбари Нурбек Расулов «Дарё» мухбири саволига жавоб берар экан.
«Дарё» мухбири билан суҳбатлашган ҳоким Шерали Санаевнинг айтишича, фермернинг «ҳоким мени урди» деган гапи ёлғон ва туҳматдан иборат.
«Туманда тўрт нафар фермер пахта терим машинасини сотиб олиш бўйича Тошкент трактор заводи билан шартнома тузган. Аммо шартнома шартларини бажармасдан ишни ортга суриб келган. Эрта-индин пахта терим бошланади. Шу боис, фермерларни чақиртириб, бунинг сабаби билан қизиқдик. Аммо фермерга қўл кўтарганимиз ва ҳақорат қилганимиз ёлғон», — дейди Шерали Санаев.
«Шартнома тузганим рост, — дейди ҳокимдан калтак еганини айтган фермер Зиёдулла Жабборов. — Аммо бу шартнома қишлоқ хўжалиги бўлими бошлиғи Музаффар Пардаевнинг қистови билан шунчаки тузилган. Шартномага имзо ҳам қўймаганман. Қишлоқ хўжалиги бўлими бошлиғи ‘шунчаки шартнома тузиб қўйинг, терим машина олишингиз шартмас’ деганди.
«Дарё» мухбири билан суҳбатлашган туман прокурори Ҳусниддин Бобомуродов фермер айтган воқеани тасдиқлади. Аммо ҳокимнинг фермерга қўл кўтарганини рад этди.
Фермерни туман марказига олиб борган ИИБ профилактика инспектори Ғиёс Эрназаров эса ҳокимлик биносидаги воқеа ҳамда ҳокимнинг фермерга қўл кўтарганини тасдиқлади.
Ғиёс Эрназаров «Дарё» мухбирининг ҳоким фермерни ургани ростми деган саволига, «ҳа» дея жавоб берди.
Ўша куни Зиёдулла Жабборов билан бирга ҳоким қабулида бўлган яна бир фермер ҳам воқеани тасдиқлади. Аммо шахси очиқланмаслигини сўради.
Изоҳ (0)