Ижтимоий тармоқларда Қорақалпоғистоннинг Тўрткўл туманида истиқомат қилган фуқаро ички ишлар органи ходимлари олиб кетганидан сўнг сирли равишда комага тушгани ва орадан 13 кун ўтиб, вафот этгани ҳақида хабарлар тарқалганди. Бош прокуратура матбуот хизмати Тўрткўлда ростан ҳам шундай ҳолат юз берганини тасдиқлаган.
Қорақалпоғистон Республикаси ИИВ ахборот хизмати ижтимоий тармоқларда «Тўрткўлда милиция бўлимида комага тушган йигит вафот этди» сарлавҳаси остида тарқалган мақолада келтирилган важлар ҳақиқатга умуман тўғри келмаслигини маълум қилди.
Вазирлик хабарига кўра, 2020 йилнинг 26 июлида, тахминан, соат 16:30 ларда Тўрткўл тумани ИИБ навбатчилик қисмига Тўрткўл тумани «Янгиобод» МФЙдаги хонадонлар биридан Х.Ч. қўнғироқ қилган. У маст ҳолатда бўлган турмуш ўртоғи С.И. ўзининг қайнотаси билан уришиб, иккови бир-бирини дўппослаётгани ҳақида маълумот берган.
«Хонадон эгаси С.И. спиртли ичимликларга ружу қўйган шахс ҳисобланиб, доимий равишда хонадонда жанжаллар уюштириб келган. Ушбу оила билан маҳалла фаоллари ҳамда профилактика инспектори томонидан доимий равишда профилактик суҳбатлар ўтказилган.
Келиб тушган хабар асосида ҳудудий профилактика инспектори лейтенант М.Жуманиязов, шериги профилактика инспектори лейтенант М.Жаббарбергенов билан бирга воқеа жойига етиб борган. Ҳодиса юз берган уйда фуқаро С.И. маст ҳолда оила тинчлигини бузгани ва унинг баданида тан жароҳатлари борлиги аниқланиб, беморга тез тиббий ёрдам кўрсатиш мақсадида туман тиббиёт бирлашмасига олиб борилган. У тиббиёт мутахассислари томонидан тиббий кўрикдан ўтказилган. Бирламчи ташхисга кўра, фуқаро И.С. маст экани, иккала оёғининг пастки қисмида тирналган, юз қисмида шилинган жароҳатлари мавжудлиги қайд этилган. Бемор касалхонада қолишни истамаган», — дейилади хабарда.
Қайд этилишича, И.С. ва унинг турмуш ўртоғи Х.Ч. ҳолатни расмийлаштириш мақсадида профилактика инспекторининг хизмат хонасига олиб келинганидан кейин фуқаронинг тоби қочган. Чақиртирилган тез тиббий ёрдам ходимлари И.С.нинг қон босими юқори бўлгани сабабли уни турмуш ўртоғи Ч.Х.нинг кузатуви остида тиббий муолажа кўрсатиш учун туман тиббиёт бирлашмасига олиб кетишган. Тиббиёт бирлашмаси ходимлари беморни тиббий кўрикдан ўтказган ва унга шу куни, тахминан, соат 18:30 ларда уйига жавоб берилган.
И.С. 27 июль куни тонгда ҳушига келмаган, фуқаронинг оила аъзолари уни туман тиббиёт бирлашмасига олиб борган ва ҳолат ҳақида туман ички ишлар бўлимига хабар берган.
«2020 йил 11 август куни И.С. туман тиббиёт бирлашмаси жонлантириш бўлимида тегишли муолажаларга қарамай кома ҳолатидан ўзига келмасдан вафот этган.
Мазкур ҳолат бўйича Тўрткўл тумани прокуратураси томонидан суриштирув ишлари олиб борилмоқда», — дея хабар қилган Қорақалпоғистон Республикаси ИИВ ахборот хизмати.
Эслатиб ўтамиз, 2020 йил 13 июнда Андижонда қийноққа солинган фуқаро вафоти сабаб 3 нафар ИИБ ходими ҳибсга олинган, воқеа 30 майда Андижон шаҳар Салоҳият кўчасида яшовчи фуқаро А.А. тан жароҳатлари билан касалхонага олиб келинишидан бошланган. Фуқаро 11 июнда вафот этган. 14 июнь куни Андижон вилояти Андижон шаҳар бўйича ички ишлар органлари (ИИО) фаолиятини мувофиқлаштириш бошқармаси (ФМБ) бошлиғи подполковник Содиқ Усмонов мазкур воқеа сабаб ишдан олинди. Кейинроқ ИИБда беш киши ишдан олингани ва 19 киши жазолангани маълум қилинди.
Изоҳ (0)