Дилшод Икромов «Ягона умумреспублика процессинг маркази» МЧЖнинг (Uzcard бренди) янги бош директори этиб тайинланди. Бу ҳақда Марказий банк матбуот хизматига таяниб, Spot хабар берди.
Дилшод Икромов бунга қадар Ўзбекистон Марказий банкининг Ахборот технологиялари департаменти директори, Ҳумо тўлов тизими раҳбари ўринбосари лавозимларида фаолият юритган.
Шу кунгача Uzcard’ни компаниянинг 75 фоиз улушига эгалик қилаётган Аҳрор Маҳмудов бошқариб келаётган эди.
«Мени бош директор этиб тайинлашганида асосий таъсисчи инглиз компанияси эди. Бозор ўзгариши муносабати билан Ҳумўга ўхшаш муқобил тўлов тизими пайдо бўлди, хорижлик ҳамкорлар бозордан чиқишга қарор қилди. Сотув бўйича узоқ жараёнлар бошланди. Ўшанда мен компания раҳбари сифатида унинг 75 фоиз улушини сотиб олиш истагини билдирдим. Кредитга маълум маблағ олдим. Қарз юки кўпая боргач, Uzcard’даги улушимни сотишга қарор қилдим. Янги таъсисчи менинг инвестицион мажбуриятларимни ўз зиммасига олди», — дея ойдинлик киритади Маҳмудов.
Май ойида Ойбек Турсунов Uzcard’нинг устав жамғармасидаги 75 фоиз улуш эгасига айлангани, қолган 25 фоиз улуш эса Uzcard ҳисобида қолгани ҳақида хабар берилган эди. 8 август ҳолатига кўра компаниянинг 51 фоизи Ўзбекистон Миллий банкига, 6 фоизи «Саноатқурилишбанк»га, 6 фоизи «Асака» банкига, 6 фоизи «Ипотека банк»га ва яна 6 фоизи «Алоқабанк»га тегишли.
Ахрор Маҳмудов, шунингдек, компаниядан кетишига ҳам изоҳ берган. Унинг таъкидлашича, янги таъсисчилар келгани сабаб у ва унинг жамоаси ишдан кетиш бўйича ариза ёзган.
«Узоқ вақт дам олиш ва таътилсиз ишлаганим сабаб ҳозирча ҳордиқ чиқармоқчиман. Таклифлар келмоқда, бироқ ҳозирча қаерда ишлашимни аниқлаб олганим йўқ», — дейди у келажакдаги режалари ҳақида.
Изоҳ (0)