Ижтимоий тармоқларда Қорақалпоғистоннинг Тўрткўл туманида истиқомат қилган фуқаро Ички ишлар органи ходимлари олиб кетганидан сўнг сирли равишда комага тушгани ва орадан 13 кун ўтиб, вафот этганига оид хабарлар тарқалди. Бош прокуратура матбуот хизмати Тўрткўлда ростан ҳам шундай ҳолат юз берганини тасдиқлади, деб хабар беради «Xabar.uz».
Маълумотларга кўра, 27 июль куни соат тахминан 07:40 ларда Тўрткўл туманида яшаган И.С. бош мия ёпиқ жароҳати, бош мия лат ейиши, мия комаси ташхиси билан ҳушсиз ҳолатда туман тиббиёт бирлашмасига олиб келинган. Кўрсатилган тиббий муолажаларга қарамасдан, бемор 11 август куни (ўзига келмасдан) вафот этган.
Дастлабки маълумотларга қараганда И.С. касалхонага олиб келинишидан бир кун аввал — 26 июль куни соат тахминан 16:00 ларда маст ҳолатда ўз уйида турмуш ўртоғи Ч.Х. билан жанжал қилган. Жанжал хабари профилактика инспекторига етиб боргач, икки нафар ИИБ ходими И.С.ни Spark’да таянч пунктига олиб келган. Ўша жойда И.С.нинг мазаси қочган ва ИИБ ходимлари бу ҳақда унинг турмуш ўртоғига маълум қилган. Аёл келиб, турмуш ўртоғини (бу пайтда у ҳушида бўлмаган) уйига олиб кетган. И.С. эртаси куни ҳам ўзига келмагач, у туман тиббиёт бирлашмасига олиб борилган.
Таъкидланишича, ҳозирда Қорақалпоғистон Республикаси прокуратураси ходимларидан иборат махсус гуруҳ тузилган. Гуруҳ айни пайтда Тўрткўлда бўлиб, воқеликка оид барча ҳолатларни (биринчи навбатда ИИБ ходимлари марҳумга жароҳат етказган-етказмаганини) синчковлик билан ўрганмоқда. Ҳолат юзасидан қўшимча маълумот берилиши маълум қилинган.
Эслатиб ўтамиз, 2020 йил 13 июнда Андижонда қийноққа солинган фуқаро вафоти сабаб 3 нафар ИИБ ходими ҳибсга олинган, воқеа 30 майда Андижон шаҳар Салоҳият кўчасида яшовчи фуқаро А.А. тан жароҳатлари билан касалхонага олиб келинишидан бошланган. Фуқаро 11 июнда вафот этган. 14 июнь куни Андижон вилояти Андижон шаҳар бўйича ички ишлар органлари (ИИО) фаолиятини мувофиқлаштириш бошқармаси (ФМБ) бошлиғи подполковник Содиқ Усмонов мазкур воқеа сабаб ишдан олинди. Кейинроқ ИИБда беш киши ишдан олингани ва 19 киши жазолангани маълум қилинди.
Изоҳ (0)