Xiaomi’нинг улкан телевизори суткалик савдолар бўйича рекорд ўрнатди

Xiaomi компаниянинг истеъмол электроникаси бозоридаги фаолиятига 10 йил тўлиши муносабати билан савдолар тўғрисидаги ҳисоботи билан бўлишди. Тақдим этилган рақамларга кўра, ишлаб чиқарувчи бир сутка ичида 1660 дан ортиқ Redmi Smart TV Max 98 телевизорларини сотишга муваффақ бўлган, деб ёзади Gizmochina.

«98 дюймли телевизор модели ойига 100 дона ҳажмда сотилаётган эди, бироқ эндиликда Redmi уни кунига 1000 дан оширишга муваффақ бўлган», — дейилади компаниянинг Weibo’даги блогида. Xiaomi’дагиларнинг таъкидлашича, улар катта форматдаги премиум телевизорни оммалаштиришга эришган.

Афтидан Redmi Smart TV Max 98’нинг оммалашиши унинг нархига боғлиқ — 2940 доллар. Бу бошқа ишлаб чиқарувчиларнинг шу турдаги маҳсулотларидан сезиларли даражада арзон ҳисобланади.

Redmi Smart TV Max 98 телевизорининг диагонали 2,5 метрга етади, унинг ўлчами қарийб стол теннисиники билан тенг. Модель учун махсус процессор яратилган бўлиб, у бир вақтнинг ўзида 192 та динамик ёритгичлар ва сифатни яхшиловчи қатор технологияларни бошқаради — бу эса улкан экрандаги тасвир сифатини таъминлайди.

Аввалроқ Xiaomi компанияси Mi TV LUX Transparent Edition номли шаффоф телевизорини тақдим этгани тўғрисида хабар берилганди.