Халқ таълими вазири Шерзод Шерматов бошчилигида 18 август, сешанба куни видеоселектор йиғилиши бўлиб ўтди. Унда мактабларнинг янги ўқув йилига тайёргарлик ҳолати кўриб чиқилди. Бу ҳақда Халқ таълими вазирлигининг ахборот хизмати хабар берган.
Шерзод Шерматов пандемия шароитида кузатув кенгашлари йиғилишлари ўтказилмагани сабабли ҳудудлардаги мактабларда директор лавозимлари бўш қолгани, бу масалани тез ва сифатли ҳал қилиш зарурлигини таъкидлаган.
Шунингдек, йиғилишда мактабларни очиш юзасидан 3 та сценарий устида иш олиб борилаётгани, уларни янги ўқув йилига шай ҳолатга келтириш зарурлиги, хусусан, тоза ичимлик суви билан таъминланиши масаласи муҳимлиги қайд этилган.
Видеоселекторда мактабларни куз-қиш мавсумига тайёргарлик кўриши масаласи ҳам кўриб чиқилиб, барча мактабларга октябрь ойига қадар маҳаллий ҳокимликлар билан биргаликда буржуйка печларидан воз кечиш зарурлиги ва бунинг учун барча чоралар кўрилиши талаби ҳам қўйилган.
«Бундан ташқари жойларда хароб аҳволда бўлган мактаб филиаллари фаолиятини тугатиб, уларни тўлақонли мактабларга айлантириш зарурлиги таъкидланди», — дейилади ХТВ ахборот хизматининг хабарида.
Йиғилишда ўқитувчилар ўртасида дарс тақсимоти масаласи ҳам кўрилиб, «Умумтаълим муассасаларида синфларни комплектлаш ҳамда тарификация рўйхатларини шакллантириш тартиби тўғрисида»ги низом бўйича ҳам маълумот берилган. Мактабларда ўқитувчиларга дарс соатларини тақсимлашда уларнинг эришган натижалари ва касбий маҳоратига эътибор қаратиш лозимлиги қайд этилди.
2020 йилнинг июнь ойида Қашқадарё вилояти халқ таълими бошқармаси бошлиғи Абдуғани Ҳимматов вилоятдаги мавжуд 1144 та мактабнинг 294 таси қиш мавсумида ҳалигача «буржуйка» печда иситилаётганини маълум қилган. Июль бошида халқ таълими вазири Шерзод Шерматов ижтимоий тармоқда эълон қилган Тошкентдаги янги таъмирланган мактаблар ҳақидаги видеороликдан кейин «Қачон вилоятда бўлади?» деб қолдирилган изоҳларга жавоб бериб, мактабларга шароит яратишда кўп масала ҳокимларга боғлиқ эканини айтганди. Шунингдек, Ўзбекистондаги салкам 1200 та мактаб филиаллари фаолияти тугатилиши ва улар босқичма-босқич равишда тўлақонли мактабларга айлантирилиши хабар қилинган.
Изоҳ (0)