Тошкентнинг Юнусобод туманидан ўтувчи Аҳмад Дониш кўчасида йўл-қурилиш ишлари давом этмоқда. Узунлиги 2,2 километрни ташкил этадиган йўл оралиғида пиёдалар йўлаги, велойўлаклар, яшил ҳудуд ва шунга ўхшаш яна бир қатор лойиҳаларни қуриш бошланган, деб хабар беради Тошкент шаҳар ҳокимлиги матбуот хизмати.
Бугунги кунда ушбу қурилиш майдонида 100 дан ортиқ махсус техника қурилиш воситалари ҳамда 200 нафарга яқин ишчи хизматчилар фаолият олиб бормоқда. Таъкидланишича, ушбу йўлнинг афзаллиги — чорраҳаларнинг 94 метргача кенгайтирилгани, аҳолининг мароқли дам олишини ташкил этиш мақсадида махсус болалар ўйингоҳлари, майдончалар ташкил этиш ҳам назарда тутилганида.
«Аҳмад Дониш ҳамда Янгишаҳар кўчалари кесишмасида йирик савдо мажмуаси ҳамда ‘Юнусобод деҳқон бозори’ жойлашгани инобатга олиниб, лойиҳада ушбу чорраҳанинг кенглиги 94 метрга қадар кенгайтирилди. Транспорт воситаларининг тўрт тарафдан ўнг тарафга тўхтовсиз ўтишларини таъминлаш мақсадида йўл ўқида хавфсиз оролчалар барпо этилган», — дейди шаҳар ҳокимлиги Қурилиш бошқармасининг лойиҳалаштириш бўлими етакчи мутахассиси Баҳром Юнусов.
Июль ойида Тошкент шаҳар ҳокими ўринбосари Даврон Хидоятов қурилиш ишлари уч босқичда амалга оширилаётгани, илк жараён сентябрь ойида якунланиши тўғрисида хабар берганди.
Юнусобод туманидаги йўлнинг буткул якунланиши ноябрь ойига режалаштирилмоқда.
Эслатиб ўтамиз, июнь ойида Тошкент метросининг «Юнусобод» йўлидаги 2 та янги бекат қуриб битказилган эди. Метронинг янги йўналишлари Аҳмад Дониш кўчасидан ўтган. Кўчани таъмирлаш ишлари метро йўналишлари якунланганидан сўнг бошланган.
Изоҳ (0)