Қорақалпоғистон соғлиқни сақлаш вазири коронавирусга чалингани ҳақидаги хабарлар рад этилди. Бироқ у шифохонада даволанмоқда

Ижтимоий тармоқда Қорақалпоғистон Республикаси соғлиқни сақлаш вазири Отажон Ҳамроевнинг коронавирусга чалингани ҳақида хабарлар тарқалди. Қорақалпоғистон ССВ матбуот хизмати эса вазир коронавирус билан касаллангани ҳақидаги хабарларни рад этди. Бу ҳақда «Kun.uz» хабар берди.

«Kun.uz»нинг ёзишича, вазир 18 кундан буён даволанмоқда. Қорақалпоғистон Республикаси соғлиқни сақлаш вазирининг биринчи ўринбосари Каллибек Худайбергеновнинг хабар қилишича, вазирга бўйин умуртқа грижасининг оғир ҳолати ташхиси қўйилган.

«Вазир коронавирус юқтириб олгани ҳақидаги хабарлар ҳеч қандай асосга эга эмас. Отажон Каримовичда бўйин умуртқаси грижаси бор ва ҳозир даволаняпти. Бу касалликдан фақат операция йўли билан фориғ бўлиш мумкин. Амалиётни эса Нукусда қилишнинг иложи йўқ. Карантин чоралари анча юмшатилди. Энди йўллар очилса, Тошкентда операция бўлиши мумкин. Давлат ишида ишлайдиган шахсларнинг ҳам касал бўлишига ҳақи бор. Буни тўғри қабул қилиш керак», — дея маълум қилган вазир ўринбосари.

Нашрнинг қайд этишича, вазирнинг коронавирусга чалингани ҳақидаги маълумотларнинг тарқалишига унинг Муса Ерниязов дафн маросимида қатнашмагани ва шундан кейинги иш жараёнларидаги йиғилишларда иштирок этмаётгани сабаб бўлган.

Вазир 18 август, сешанба куни бўлиб ўтган Қорақалпоғистон Республикаси Жўқорғи Кенгесининг навбатдаги олтинчи сессиясида ҳам иштирок этмаган.

Отажон Ҳамроев Қорақалпоғистон Республикаси Жўқорғи Кенгеси Президиумининг қарори билан 2020 йил 13 май куни соғлиқни сақлаш вазири этиб тайинланганди.

Эслатиб ўтамиз, 31 июль куни Қорақалпоғистон Жўқорғи Кенгеси раиси, Ўзбекистон Қаҳрамони, сенатор Муса Ерниязов коронавирус инфекцияси асоратларидан вафот этган эди. Унда коронавирус 24 июнь куни тасдиқланган, бир ой оғир аҳволда бўлган, бироқ унинг касаллиги 18 июлга қадар яширилган эди.

Аввалроқ ижтимоий тармоқларда Бухоро вилояти ҳокими вазифасини бажарувчи Карим Камолов коронавирус оқибатида вафот этгани ҳақида хабарлар тарқалганди, бироқ Бухоро вилояти ҳокимлиги матбуот хизмати Карим Камоловнинг вафоти ҳақидаги гап-сўзлар «ҳеч қандай асосга эга эмас»лигини таъкидлаб, вилоят раҳбари Тошкент шаҳрида даволанаётганини маълум қилди.