Xiaomi компанияси янги Mi 10 Ultra ёки Mi 10 Extreme Commemorative Edition флагман смартфони савдолари бошланиши билан эришилган муваффақиятли натижалар билан бўлишди. Янги қурилма ҳақиқий хитга айланди, деб хабар беради IXBT.
Xiaomi Мi 10 Ultra савдолари Хитойда 16 август куни эрталаб бошланган. Компаниянинг маълум қилишича, дастлабки 10 дақиқа ичида 57,7 миллион долларлик партия сотиб юборилган. Таққослаш учун, Xiaomi 10 Pro’нинг дастлабки савдолари ушбу даражадан икки баробар камроқ натижани қайд этганди.
Компания қурилмаларнинг айнан сони тўғрисида маълумот бермаган. Бироқ Xiaomi Мi 10 Ultra нархи 760 ҳамда максимал 1007 долларни ташкил этиши ҳисобга олинса, биринчи партияда 57 мингдан 75,5 минг донагача қурилма бўлган.
Смартфонга пикселлар сони 2340х1080 га тенг 6,67 дюймли экран ўрнатилган. Сиғими 4500 мА/соатга тенг аккумулятор 120 ваттли тезкор қувватланиш ҳисобига ўз зарядини 23 дақиқада тўлдира олади, шунингдек, 50 ваттли симсиз қувватланиш функцияси ҳам мавжуд.
Xiaomi Мi 10 Ultra’га ўрнатилган 48 мегапикселли камера DxOMark рейтингида Huawei P40 Pro’ни ортда қолдириб, мобил камералар орасида янги «қиролга» айланди.
Смартфон асосини бир кристалли Snapdragon 865 процессори, 16 гигабайтли LPDDR5 тезкор ва 512 гигабайтли ички хотира ташкил этади.
Аввалроқ Xiaomi Мi 10 Ultra смартфонини ишлаб чиқариш учун Пекинда «ақлли завод»ни ишга туширгани тўғрисида хабар берилганди.
Изоҳ (0)