Samsung Galaxy S20 FE: арзонлаштирилган флагман сурати эълон қилинди

OnLeaks ники остидаги таниқли инсайдер Galaxy S20’нинг ҳамёнбоп версиясига айланиши кутилаётган Samsung’нинг янги смартфони суратлари билан бўлишди, деб хабар беради Hi-Tech.Mail.ru.

Флагманнинг арзонлаштирилган версияси нима сабабдандир Galaxy S20 FE деб номланган бўлиб, бу Fan Edition ёки «фанатлар учун версия» дегани. 2019 йилда бу каби смартфон «лайт»-версияси шаклида тақдим этилганди.

Смартфон дизайнида ўзидан олдинги моделдан фарқланиб турувчи жиҳат бор — орқа томонига шиша эмас, пластик қопқоқ ўрнатилган. Шу билан бирга, асосий ром қисми металлигича қолган ва сувдан IP68 стандарти бўйича ҳимояланган.

Қурилмага диагонали 6,5 дюймли дисплей, 140 герцли AMOLED-матрица ўрнатилган.

Galaxy S20 FE учта асосий камерали жамланмага эга бўлади — 12 мегапикселли асосий (оддий S20’даги каби), 12 мегапикселли кенг бурчакли ҳамда 8 мегапикселли 3 карра оптик зум. 32 мегапикселли фронтал камера эса дисплейдаги кичкина қирқимга «яширилади».

Смартфон минтақасига қараб Snapdragon 865/Exynos 990 процессорлари базасида ишлайди. Тезкор хотира 6—12 гигабайт, ички хотираси эса 512 гигабайтга қадар етадиган модификациялар тақдим этилади. Наушниклар учун алоҳида 3,5 миллиметрли «разём» олиб ташланади.

Ҳозирча Galaxy S20 FE’нинг техник тавсифлари ўзидан олдинги Galaxy S20’никига жуда ўхшаш. Аслида эса смартфон 10-25 фоизга арзонроқ бўлиши керак, бироқ пластик корпусдан бошқа ниманинг ҳисобига иқтисод қилинаётгани номаълум.

Samsung компанияси Galaxy S20 Lite ҳамёнбоп флагманини тақдим этиши тўғрисида июль ўрталарида маълум бўлганди. Ўшанда Galaxy S20 Lite’нинг дисплейи ҳам арзонроқ моделга ўзгартирилиши мумкинлиги — унинг ўлчами бироз кичикроқ бўлиб, пикселлар сони камайиши айтилганди.