Лукашенко янги конституция қабул қилинганидан кейин сайловлар қайта ўтказилиши мумкинлигини инкор этмади
Беларусда янги конституцияни қабул қилиш бўйича референдум бўлиб ўтганидан кейин президентлик сайловлари қайта ўтказилиши мумкин. Бу ҳақда амадаги президент Александр Лукашенко маълум қилган, деб ёзмоқда Sputnik Беларусь.
«Гап бундай йигитлар. Биз сиз истаганингиз, яъни янги конституцияни қабул қилишимиз керак, муқобил қарорни қўллаб-қувватлаганлар ҳам бунга қарши эмас. Эҳтимол, парламент, президентлик ва маҳаллий кенгашларга сайловлар ҳам қайтадан ўтказилар», — деган Лукашенко Минскдаги ғилдиракли шатакчилар заводидаги учрашувда.
Мавзуга доир: Минскдаги завод ишчилари Лукашенкони «Кет!» дея кутиб олди. Лукашенко: «Кет деб бақираверинглар», деди ва кетди
Намойишларнинг дастлабки кунлари кучишлатар тизим вакиллари томонидан фуқароларга нисбатан зўравонлик ҳолатлари кузатилган, одамларга қарата кўзни ёшлантирувчи газ, водомётлар ва резина ўқлар отилган. Кейинчалик милиция ва ҳарбийларнинг ушбу зўравонликлари анча камайган.
Расмий маълумотларга кўра, намойишлар бошланган дастлабки кунларда 6,7 минг нафардан зиёд одам қамоққа олинган. Беларусь ИИВнинг хабар қилишича, тартибсизликлар оқибатида юзлаб одамлар жароҳатланган, ҳуқуқ тартибот органлари ходимларининг 120 нафарга яқинига шикаст етган, бир нафар ходим ҳалок бўлган.
Аввал Европа парламенти Лукашенкога Persona non grata мақомини бергани ва Кремлдан Беларуснинг ички ишларига аралашмасликни сўрагани хабар қилинганди. Ундан олдин интернетда Беларусь томон Россия Миллий гвардиясининг ўнлаб ҳарбий техникалари ҳаракатланаётгани ҳақида видеолар тарқалган.
