Фарғона халқаро аэропортида «АрМИ–2020» Халқаро армия ўйинлари мусобақасининг «Йўл патрули» йўналишида иштирок этадиган Россия ва Беларусь давлатларининг ҳарбий жамоалари тантанали равишда кутиб олинди. Бу ҳақда Мудофаа вазирлиги ахборот ва оммавий коммуникациялар департаменти хабар берди.
Маълум қилинишича, меҳмонлар муносиб ҳордиқ чиқаришлари учун Шарқий ҳарбий округга қарашли ҳарбий қисмга жойлаштирилган. Шундан сўнг меҳмонлар учун тантанали митинг ва Россия ҳамда Беларусь давлат байроқларини кўтариш маросими бўлиб ўтган.
Таъкидланишича, барча тадбирлар карантин қоидалари асосида ўтказилмоқда.
Эслатиб ўтамиз, 2019 йилнинг 3—17 август кунлари 10 та давлат ҳудудида «АрМИ–2019» халқаро армия ўйинлари бўлиб ўтган эди. Жиззахдаги «Фориш» полигони биринчи бор «Ҳарбий-тиббий эстафета» йўналишига мезбонлик қилганди.
Мазкур тадбир доирасида 39 та давлатдан 32 та номинацияда 222 та жамоа беллашган. Ўзбекистон Мудофаа вазирлигидан 14 та жамоа иштирок этган эди. «Танк биатлони» ва «Ҳарбий-тиббий эстафета» танловида қатнашган Ўзбекистон жамоаси совринли 1-ўринни, «Содиқ дўст», «Рембат», «Эльбрус ҳалқаси», «Қўшинлар разведкаси аълочилари» – 2-ўринни ҳамда «Хавфсиз маршрут», «Мусаффо осмон», «Йўл патрули», «Дала ошхонаси», «Артиллерия олови устаси» – 3-ўринни эгаллаган эди.
Изоҳ (0)