Сурхондарё вилояти ҳокими Тўра Боболов Тошкент шаҳрида даволанишдан сўнг буткул соғайиб, воҳага қайтди. Бу ҳақда вилоят ҳокимлиги матбуот хизмати хабар бермоқда.
Ҳокимлик томонидан эълон қилинган суратлардан Тўра Боболов Тошкентдан ҳарбий самолётда қайтганини пайқаш мумкин.
«Тўра Боболов Термиз халқаро аэропортида вилоят секторлари раҳбарлари, вилоят ҳокими ўринбосарлари ва бошқа мутасаддилар билан мулоқот ўтказиб, воҳада олиб борилаётган ислоҳотларни изчил давом эттириш, коронавирус пандемиясини жиловлаш, аҳоли саломатлигини муҳофаза қилиш, пандемия шароитида ижтимоий-иқтисодий ва бошқа соҳаларнинг барқарор ишлашини таъминлаш ҳамда бошқа зарур масалалар хусусида атрофлича фикр алмашди.
Вилоят ҳокими янги ғоялар билан ўз вазифасини бажаришга киришди», — дейилади Сурхондарё вилояти ҳокимлиги ахборот хизмати хабарида.
Эслатиб ўтамиз, Тўра Боболовнинг коронавирусга чалингани ҳақидаги гаплар июль ойининг биринчи қисмида пайдо бўлганди. Ҳоким йиғилишларда бевосита қатнашмай, Zoom дастури орқали иштирок этаётганди. Ўша пайтда вилоят ҳокимлиги матбуот хизмати Боболовнинг COVID-19 юқтириб олганини рад этганди. Аммо 18 июлга келиб Соғлиқни сақлаш вазирлиги Қорақалпоғистон Жўқорғи Кенгеси раиси Муса Ерниязов Нукусда ва Сурхондарё ҳокими Тўра Боболов Тошкентда коронавирусдан даволанаётганини маълум қилди. Боболовнинг ҳатто вафот этгани ҳақида ҳам хабарлар пайдо бўлди, аммо ҳокимнинг ўзи видеомурожаат билан чиқди ва аҳволи яхши эканлигини билдирди. Унинг ўлими ҳақида хабар тарқатганлар жазога тортилди.
Изоҳ (0)