Одам иммунитети танқислиги вируси билан яшаётган инсон ҳар қандай инфекцияга мойил бўлади — Коронавирусга қарши кураш штаби аъзоси

Одам иммунитети танқислиги вируси (ОИВ) билан яшаётган инсонларда вирусли юкламалар турли хил асоратларга олиб келиши мумкин. Бу ҳақда 16 август куни АОКАда бўлиб ўтган брифингда Коронавирусга қарши кураш штаби аъзоси, Тошкент тиббиёт академияси проректори Шуҳрат Боймуродов маълум қилди.

«ОИВ билан яшаётган инсонлар, касалликни ўтказиб юборганлар, CД4 даражаси ва вирусли юкламалари паст бўлганлар, шунингдек, антиретровирус давосини олмаётганлар ҳар қандай инфекцияга мойил бўлиб, асоратларга олиб келади», – деди профессор Боймуродов.

Маълумот учун, Ўзбекистонда 2019 йил 1 ноябрь ҳолатига кўра, ОИТСга чалинганлар сони 42 098 нафарни ташкил этган. 2019 йилнинг 10 ойи давомида мамлакатда ОИТСга чалиниш бўйича 3 337 та ҳолат аниқланган, шу жумладан, эркаклар орасида 1919 та (57,7 фоиз) ва аёллар орасида 1418 та ҳолат (42,5 фоиз). Ўтган йилнинг шу даври билан солиштирганда бу кўрсаткич 69 тага ёки 1,8 фоизга пасайган. ОИТСнинг онадан янги туғилган чақалоққа ўтиш ҳолати 2013 йилдаги 2,3 фоиздан 2018 йилда 0,3 фоизга камайган.