Соғлиқни сақлаш вазирлиги интернетда Тошкент шаҳар 3-сонли юқумли касалликлар шифохонаси ходимларининг муассаса фаолиятини қайта тиклаш ва тегишли тўловларни тўлаб бериш билан боғлиқ мурожаати юзасидан мазкур шифохонадаги вазият ўрганилганини хабар қилди.
Хабарга кўра бош вазири ўринбосари, Соғлиқни сақлаш вазири вазифасини бажарувчи Беҳзод Мусаев ҳам ўрганишда бевосита иштирок этган. Мусаев тиббиёт ходимлари билан юзма-юз мулоқотда бўлиб, вазиятга ойдинлик киритган.
Вазирлик ахборотига кўра, 3-сонли юқумли касалликлар шифохонаси ходимлар Зангиота туманида 2 807 ўринлик янги очилган юқумли касалликлар шифохонасига жалб қилинганлиги туфайли ўз фаолиятини вақтинча тўхтатган.
Шунингдек, ССВ 3-сонли юқумли касалликлар шифохонасининг 243 нафар тиббиёт ходими Республика махсус комиссиясининг 2020 йил 6 июлдаги 32-сонли баёнига асосан Зангиота юқумли касалликлар шифохонасига сафарбар этилганини маълум қилган. Қайд этилишича, муассаса ишга тушганидан кейин биринчи 14 кунлик навбатда ушбу шифохонадан 63 нафар ходим (шифокор, ўрта ва кичик тиббий ходимлар), 21 июлдаги иккинчи 14 кунликка 16 нафар ходим ишга чақирилган. 5 августдаги учинчи 14 кунлик навбатда ишлаш истагида бўлган 53 нафар ходим жалб қилинган.
«Ўрганишларда тиббиёт ходимларининг барча талаблари қондириладиган бўлди. Хусусан, эпидемик вазиятнинг барқарорлашаётгани инобатга олиниб, аҳолига кўрсатиладиган тиббий хизмат сифати ва самарадорлигини ошириш мақсадида Тошкент шаҳар 3-сонли юқумли касалликлар шифохонаси фаолияти қайта тикланиб, ходимлар иш жараёнига қайтарилиши белгиланди. Шунга кўра, ушбу шифохона очилиб, 15 августдан бошлаб беморларни қабул қила бошлади.
Бундан ташқари, карантин сабаб иш жараёнидан узилиб қолган ходимларга қонун ҳужжатларида кўрсатилган тартибда асосий лавозим маошидан кам бўлмаган миқдорда иш ҳақи ҳам тўлиқ тўлаб берилди. Қолаверса, Зангиота юқумли касалликлар шифохонасида ишлаш истагини билдирган ходимларнинг мурожаатларини тегишли тартибда кўриб чиқиш бўйича керакли топшириқлар берилди», – дейилади вазирлик баёнотида.
Изоҳ (0)