Ўзбекистонда 15 августдан бошлаб карантин чекловлари енгиллаштирилди. АОКА ҳузурида ташкил этилган брифингда Коронавирусга қарши кураш штаби аъзоси Барно Абдусаматова карантин чекловлари юмшатилиши уни бекор қилинганини англатмаслигини таъкидлаб ўтди.
«Карантин чекловларини енгиллатиш у бекор қилинганини англатмайди.
Коронавирус инфекцияси эпидемиясининг олдини олиш мақсадида Республика махсус комиссияси ва Соғлиқни сақлаш вазирлиги фуқароларни индивидуал ҳимоя чораларига қатъий риоя қилишда давом этишга чақиради. Жумладан:
- жамоат жойларида, албатта, ниқоб тақиш;
- ижтимоий масофа сақлаш;
- мунтазам қўлларни ювиш ва антисептик воситалардан фойдаланиш.
Маълумот учун, Ўзбекистонда коронавирус эпидемияси тарқалишининг олдини олиш мақсадида 23 мартдан эътиборан оммавий тадбирлар, хусусан, тўй-маросимларнинг ўтказилиши тақиқланган эди. Ушбу тақиқдан сўнг тўй маросимларини ўтказишга уринганларга нисбатан ҳатто жиноят иши ҳам қўзғатилди. Мамлакатда эпидемиологик вазият барқарорлашиб, нисбатан назорат остига олингач, Республика махсус комиссиясининг 30 майдаги қарори билан «яшил» тоифага киритилган ҳудудларда оилавий тантана, тўй, маърака ва маросимларни 30 кишидан кўп бўлмаган ҳолда ўтказишга рухсат берилди.
Мамлакатда коронавирус билан боғлиқ вазият кескинлашаётгани сабабли 10 июлдан бошлаб мамлакатда тўйларни ўтказиш яна тақиқланганди. Ўзбекистонда карантин юмшатилиши асносида, 15 августдан бошлаб 30 кишилик тўйлар ўтказилишига, маҳаллий авиа ва темир йўл қатновларига рухсат берилган. Шунингдек, 17 августдан масжидлар очилиши ҳам кўзда тутилган.
Изоҳ (0)