АОКА ҳузуридаги штабда Коронавирусга қарши курашиш штаби аъзоси Барно Абдусаматова иштирокида брифинг ўтказилди. Унда Россияда ишлаб чиқарилган вакцинанинг Ўзбекистонга олиб келиниши ҳақида саволга жавоб берилди.
«Россия давлати билан вакцинани олиб келиш бўйича ишлар олиб бориляптими? Ўзбекистонда ҳам вакцинани ишлаб чиқиш мумкинми?», — дея берилган саволга Барно Абдусаматова қуйидагича жавоб берди:
«Ҳозирги кунда Президент топшириғига биноан, вакцинани харид қилиш ва мамлакатимиз аҳолисини эмлашни амалга ошириш йўлларини ўрганиб чиқиш мақсадида етакчи олимлар ва тажрибали шифокорлардан иборат ишчи гуруҳи тузилган.
COVID-19 вакцинаси клиник синовларининг барча босқичи якунланмагунича мамлакат уни сотиб ололмайди.
Вакцина синовларининг барча босқичлари ўтганидан кейингина халқаро сертификатлаштириш амалга оширилади. У қайси давлат ёки лаборатория бўлади, бу ҳозирча номаълум.
Коронавирусга қарши ишлаб чиқарилган вакциналарни ҳар томонлама ўрганиб, Ўзбекистонда ишлатиш бўйича ишчи гуруҳ хулоса берса, вакцинани олиб келиш, ишлатиш тартиблари ва муддатлари белгиланади».
Коронавирусга қарши курашиш штаби аъзосининг таъкидлашича, вакцинани ишлаб чиқариш, уни клиник синовлардан ўтказиш учун вақт талаб қилинади. Уни Ўзбекистонда ишлаб чиқаргандан кўра, тайёр вакцинани ишлатган маъқул.
Аввалроқ Қозоғистон ҳам клиник синовларнинг барча босқичлари якунланмагунича COVID-19 вакцинасини сотиб олмоқчи эмаслигини билдирган эди.
Эслатиб ўтамиз, Россияда 11 август куни коронавирусга қарши вакцина рўйхатга олинганини Владимир Путин эълон қилди. Унинг сўзларига кўра, вакцина «барқарор иммунитетни шакллантиради ва у барча керакли синовлардан ўтган». Вакцина камида 10 АҚШ долларидан сотилиши мумкинлиги ҳақида маълум қилинган.
Лекин Россиянинг «Фонтанка» нашри юқоридаги вакцина Путин айтганичалик умидли эмаслигини хабар қилди. Нашрнинг ёзишича, тадқиқот давомида вакцина синаб кўрилган 38 нафар кўнгиллида 144 та ножўя таъсир кузатилган. ЖССТ эса Россиянинг коронавирусга қарши вакцина синовлари тўғрисидаги маълумотларни текширмоқчилигини билдирган.
Изоҳ (0)