Интернетда 3 нафар аёлнинг бошқа бир аёлни ураётгани ва ҳақорат қилаётгани видеоси тарқалганди. Тошкент шаҳар ИИББ ҳолат юзасидан тергов олиб борилаётганини хабар қилган эди. «Ўзбекистон 24» телеканалида ҳолат бўйича тафсилотлар маълум қилинди.
Маълум қилинишича, тасвирдаги ҳолат Тошкент шаҳар ИИББ аввал хабар қилганидек 7 августда эмас, 31 июлда содир бўлган. Қисқа муддатда иштирокчиларнинг шахси аниқланиб, воқеанинг асл сабаблари ўрганилган.
Таъкидланишича, жанжалга бир нарса сабаб бўлмаган. Ижара пули муаммосидан тортиб, вояга етмаган болага нисбатан уятсиз ҳаракатлар қилганликда, шунингдек, бир аёлнинг эрини йўлдан уриш айблари билан айбланган аёл «самосуд» қилинган.
Айбланувчи аёллар ҳолат бўйича ўз кўрсатмаларини бериб ўтган.
«Бесабаб урмадим. Булар иссиқ-совуқ қилгани учун, мени машинам, уйим учун боламга тегиши керак эмас эди. Мени боламга тегмаганда бу қизни урмасдим», — дейди айбланувчи аёллардан бири.
Жанжал вақтида хонада воқеа сабабчиларидан бири ҳисобланган эркак ҳам бўлган. Лекин у жанжални бефарқлик билан кузатган.
«Мен ўша ерда ўтирган эдим. Аёлларни ишига мен қўшилмайман-ку», — дейди у.
Аёллар видео интернетда тарқалишини хаёлга ҳам келтирмаганини айтган.
«Видео мени телефонимга олинган. Мен ўртоғимга ташлаб берганман. У кўргандан сўнг ўчириб ташлашини айтган», — дейди айбланувчилардан бири.
Воқеа юзасидан ИИОга ҳеч қандай хабар келиб тушмаган бўлса-да, туман прокуратураси томонидан Жиноят кодексининг 110-моддаси (қийнаш) билан жиноят иши қўзғатилган.
Сергели тумани 4-сонли ИИБ суруштирувчиси Бахтиёр Раҳматовнинг маълум қилишича, айбланувчи, ҳар учала аёл ҳам муқаддам Жиноят кодексининг 131-моддаси 1-қисми (қўшмачилик қилиш ёки фоҳишахона сақлаш) бўйича судланган. Уларга нисбатан терговда тўпланган ҳужжатларга асосланиб, Жиноят кодексининг 277-моддаси (безорилик), 140-моддаси (ҳақорат қилиш), 112-моддаси (ўлдириш ёки зўрлик ишлатиш билан қўрқитиш) ҳамда 110-моддаси (қийнаш) билан айблов эълон қилиниб, қамоққа олиш тарзда эҳтиёт чораси қўлланилган.
Айбланувчилар ўз қилмишларидан пушаймон эканлигини билдирган.
Аввал Самарқандда тунда учрашувга чиққан йигит ва қизни «самосуд» қилган фуқаролар иши судга оширилган, Қўшкўпирда бир аёлни «самосуд» қилганларга нисбатан жиноят иши қўзғатилган, Хоразмда аёлнинг «самосуд» қилинишига нима сабаб бўлгани маълум қилинганди. Шунингдек, ИИВ ҳузуридаги Тергов департаменти Хоразм вилояти Гурлан туманида бир аёлнинг «самосуд» қилингани тасвирланган видео юзасидан маълумот берган ва ҳодисанинг июль ойида содир бўлганини қайд этганди.
Изоҳ (0)