Ҳар қандай ёшда хотирани мустаҳкамловчи 8 та табиий маҳсулот

Хотиранинг сустлашиши — қариш жараёни бошланганининг энг биринчи белгисидир. Кўпинча бу белги 30 ёшгача пайдо бўлади. Cosmopolitan айнан шу масалада мутахассислардан жавоб олди.

2011—2015 йиллар давомида 58-98 ёшли инсонлар орасида тадқиқот олиб борилди. Уларга турли хил саволлар берилди, парҳези кузатилди ва шу орқали хотира синови ўтказилди.

Тадқиқотда ҳафтада бир маротаба фастфуд егуликлари, гўшт кун ора ва ундан ҳам камроқ, ширинлик ҳафтада 5 марта ва ундан ҳам камроқ истеъмол қилган инсонлар яхши натижа кўрсатди. Бундан ташқари, улар сариёғ ва маргарин истеъмолини камайтирган. Асосан зайтун ёғидан фойдаланган. Демак, саломатликни асраш учун нафақат тўғри овқатланиш, балки кераксизларини чиқариб ташлаш лозим.

Резаворлар

Тавсия этилади: ҳафтада 2 марта

Меъёри: 150 гр

Қулупнай, малина — ҳар қандай резаворлар тавсия этилади. Улар антиоксидантларга бой бўлиб, нафақат хотира, балки бутун танага фойдали ҳисобланади.

Кўкат ва карам

Тавсия этилади: ҳар куни

Меъёри: 50 гр

Салат барги, укроп, майданоз (петрушка), қалампир — фолат кислоталарига бой ҳамда деменция хавфини камайтиради. Маълумот учун, деменция касаллигига чалинган инсонларда ақл-заковати учун хос бўлган барча руҳий функциялар сустлашиб боради. Хотиранинг барча турлари — эшитиш, кўриш ва ҳаракат хотиралари бузилади. Масалан, бирор гапни гапираётиб ҳам унутиб қўйиш мумкин. Деменцияни қисқача қилиб «тафаккур бузилиши» дейишади.  Брокколи ва бруссел эса организмга токсинларни чиқариб юборишда ёрдам беради.

Дон маҳсулотлари

Тавсия этилади: ҳафтада 3 марта

Меъёри: 100 гр

Фасол, ловия, нўхат ва мош оқсилларга бой бўлиб, когнитив иш фаолиятини яхшилайди.

Нон маҳсулотлари

Тавсия этилади: ҳафтада 3-4 марта

Меъёри: 100-150 гр макарон ёки бўтқа, 2 бўлак нон

Шифокорлар модда алмашинуви учун зарарли бўлган гуруч, макарон маҳсулотлари таркибида бўлувчи оддий углеводларни қисқартириш кераклигини таъкидлайди.

Курка ва товуқ гўшти

Тавсия этилади: ҳафтада 2-3 марта

Меъёри: 150 гр

Ёғли гўшт ўрнига жуда яхши ўрибосар. Ёғга кам тўйинган, лекин оқсилга бой.

Балиқ гўшти

Тавсия этилади: ҳафтада 2 марта

Меъёри: 100-150 гр

Балиқ таркибида омега-3 ёғ кислотаси мавжуд, бу эса альцгеймер касаллиги хавфини камайтиради.

Ёнғоқлар

Тавсия этилади: ҳафтада 5 марта

Меъёри: 30 гр

Ҳар қандай ёнғоқ ва ёнғоқ ёғи (шакари кам бўлишига қаранг) ҳам фойдали, ёнғоқ полифенолага бой, деменция касаллигининг олдини олади.

Зайтун ёғи

Уни ҳар қандай ёғнинг ўрнига ишлатиш керак, айниқса қовурма таомларда. Улардан «Extra virgin» номи остидагисидан фойдаланган афзал.